काठमाडौं । जेनजी आन्दोलनका क्रममा भदौ २४ गते सुन्धारास्थित सेन्ट्रल जेलबाट भागेका पूर्व सांसद टोपबहादुर रायमाझी मंगलबार डिल्लीबजार कारागारमा उपस्थित भएका छन्।

नक्कली भुटानी शरणार्थी प्रकरणमा पुर्पक्षका लागि थुनामा परेका रायमाझी विघटित प्रतिनिधिसभामा अर्घाखाँचीबाट निर्वाचित सांसद हुन्।

कारागार व्यवस्थापन विभागले कैदीबन्दीलाई आफूलाई अनुकूल हुने कारागारमा स्वेच्छाले उपस्थित हुन सूचना दिएपछि रायमाझी डिल्लीबजार पुगेका हुन्। उनले सेन्ट्रल जेलमा बस्न असुविधा भएको भन्दै यहाँ बस्ने इच्छा प्रकट गरेको कारागार प्रशासनले जनाएको छ।

रायमाझीले सेन्ट्रल जेलमा भएको तोडफोड र आगजनीका कारण आफ्ना सबै बन्दोबस्तीका सामग्री जलेको बताउँदै लुगाफाटोसहित कारागारमा पुगेको जानकारी प्रशासनलाई दिएका थिए।

सेन्ट्रल जेलबाट भागेका ३३ सयमध्ये हालसम्म करिब एक हजारजति कैदीबन्दी मात्र फर्किएको प्रशासक कृष्णप्रसाद चापागाईंले जानकारी दिएका छन्। उनीहरूमध्ये करिब सयजति विभिन्न जिल्लाका कारागारमा पुगेका छन्।