काठमाडौं । काठमाडौंको बनस्थलीमा बिहीबार बिहान सवारी दुर्घटनामा परेर एक वृद्धको मृत्यु भएको छ। साढे ५ बजेका समयमा बा.प्र. ०१-००६ ख ७५४३ नम्बरको महानगर यातायातको बसले मुख्य सडकमा पैदलयात्रीलाई ठक्कर दिँदा ६८ वर्षीय जसबहादुर मगरको घटनास्थलमै ज्यान गएको ट्राफिक प्रहरी कार्यालय काठमाडौं उपत्यकाका एसपी दीपक गिरीले जानकारी दिएका छन् ।

मगरको स्थायी ठेगाना संखुवासभा भए पनि उनी हाल बनस्थलीमा बसोबास गर्दै आएका थिए। दुर्घटनापछि सुरक्षाकर्मीहरू घटनास्थलमा खटिई मृतकको शव सुरक्षार्थ राखिएको छ। एसपी गिरीका अनुसार अहिले कानुनी प्रक्रिया अगाडि बढिरहेको छ र प्रक्रिया पूरा भएपछि पोस्टमार्टमका लागि शव लगिनेछ। हाल दुर्घटनाबारे थप अनुसन्धान भइरहेको प्रहरीले जनाएको छ।