काठमाडौं । प्रधानमन्त्री केपी शर्मा ओलीले भोलि (शुक्रबार) बस्ने प्रतिनिधिसभाको बैठकमा सम्बोधन गर्ने भएका छन् । शनिबार चीन भ्रमणमा निस्किन लागेका प्रधानमन्त्री ओलीले आफ्नो भ्रमणबारे संसदलाई जानकारी गराउने तयारी गरेका हुन् ।

सभामुख देवराज घिमिरेले बिहीबार सिंहदरबारमा प्रमुख दलका प्रमुख सचेतकहरूसँग छलफल गर्दै प्रधानमन्त्रीको सम्बोधनबारे जानकारी दिएका हुन् । बैठकमा संसदको आगामी १५ दिनको कार्यतालिका पनि तय गरिएको एमाले प्रमुख सचेतक महेश बर्तौलाले जानकारी दिए ।

कार्यतालिका अनुसार, भदौ १३ गतेको बैठकमा भूमिसम्बन्धी विधेयक पारित गरी राष्ट्रिय सभामा पठाइनेछ। भदौ १८ गते नागरिकता र संवैधानिक परिषद् सम्बन्धी विधेयकमाथि छलफल हुनेछ । त्यस्तै, भदौ १९ गते निजामति सेवा विधेयक पारित गर्ने र भदौ २६ गते विद्यालय शिक्षा विधेयक संसदबाट पारित गर्ने तयारी गरिएको छ ।

माओवादी प्रमुख सचेतक हितराज पाण्डेले संसदको आगामी बैठक मितिहरू भदौ १८, १९, २५, ২৬ र २७ गते निर्धारण भएको जानकारी दिए । प्रधानमन्त्रीको चीन भ्रमणलाई लिएर संसदमा चासो रहेको बेला उनको सम्बोधनलाई महत्वपूर्ण रुपमा हेरिएको छ ।