दार्चुला । नेकपा (एमाले) पोलिटब्यूरो सदस्य तथा पूर्वमन्त्री गणेशसिंह ठगुन्नाले आफु राष्ट्रियताको सवाल उठाएकै कारण चुनावमा पराजित भएको दाबी गरेका छन्। भारतले अतिक्रमण गरेका नेपाली भूभागहरूबारे आवाज उठाएपछि ठूलो षड्यन्त्र र आर्थिक चलखेलका कारण आफु चुनावमा हराउनु परेको उनको भनाइ छ।

एक पत्रकार सम्मेलनमा बोल्दै ठगुन्नाले भने, “राष्ट्रियता बोलेको कारण म हार्नुपर्‍यो, भारतले ठूलो खर्च गर्‍यो। कालापानी, लिपुलेक र लिम्पियाधुरा नेपालको भूमि हो भन्ने कुरा संसदभित्र र बाहिर उठाएपछि मलाई हराउन भारतले १५–२० करोड रुपैयाँ खर्च गर्‍यो।”

उनले राष्ट्रियताको मुद्दा कुनै दल विशेषको नभइ सबै नेपालीको साझा विषय भएको उल्लेख गर्दै, “म जनप्रतिनिधि भए पनि नभए पनि राष्ट्रियताको सवाल जहिल्यै उठाइरहन्छु,” भन्दै आफ्नो अडान दोहोर्‍याए ।