काठमाडौं । बंगालको खाडीबाट जलवाष्पयुक्त हावा नेपाल प्रवेश गरिरहेकाले देशभर मौसम बदली रहेको छ । जल तथा मौसम विज्ञान विभागका अनुसार मनसुनको न्यूनचापीय रेखा दक्षिणतर्फ रहेकाले मनसुन केही कमजोर भए पनि वर्षा हुने क्रम जारी छ ।

मंगलबार दिउँसो कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका पहाड तथा तराईका केही स्थानमा मध्यम वर्षा र कोशी–बागमती प्रदेशका पहाडी भू-भागमा भारी वर्षाको सम्भावना छ ।

गत २४ घन्टामा गोरखाको बारपाकमा ७७ मिलिमिटर, सिन्धुपाल्चोकको गोब्रेमा ७५.४ मिलिमिटर, काठमाडौंको धापमा ६६.२ मिलिमिटर र अछामको सुगालीमा ५५.४ मिलिमिटर वर्षा भएको छ । विभागले सम्भावित बाढी, पहिरो र जलस्रोतको सतर्कताका लागि आवश्यक सावधानी अपनाउन आग्रह गरेको छ ।