काठमाडौं । आज साउन महिनाको अन्तिम सोमबार, देशभरका शिवालयहरूमा श्रद्धालुहरूको ठूलो भीड लागेको छ । विशेष गरी पशुपतिनाथ मन्दिरमा भक्तजनहरूको सङ्ख्या बढी रहेको छ । साउन महिनाको हरेक सोमबार व्रत बसेर भगवान शिवको पूजा अर्चना गर्ने श्रद्धालुहरू आज विधिपूर्वक आफ्नो व्रत समाप्त गर्दैछन् ।

साउन महिनाको सोमबारलाई भगवान शिवको प्रिय दिन मानिन्छ र यस दिन विशेष पूजा, व्रत र दानका साथ भक्तजनहरूले सुख, शान्ति, समृद्धि र परिवारको कल्याणको कामना गर्छन् । धर्मशास्त्रका जानकार डा. बासुदेवकृष्ण शास्त्रीका अनुसार, यस दिन शिवको पूजा गर्दा भक्तजनलाई जीवनका कष्ट र कठिनाइहरूबाट मुक्ति प्राप्त हुन्छ भन्ने धार्मिक विश्वास छ ।