काठमाडौं: नेपाल प्रहरीका दुई जना प्रहरी नायब महानिरीक्षक (डीआईजी) प्रहरी अतिरिक्त महानिरीक्षक (एआईजी)मा बढुवा भएका छन् । प्रधानमन्त्री तथा मन्त्रिपरिषद्को कार्यालय सिंहदरबारमा बसेको मन्त्रिपरिषद् बैठकले जनपद र प्राविधिकतर्फका २ जना डीआईजीपीलाई एआईजीपीमा बढुवा गर्ने निर्णय गरेको हो ।

सरकारका प्रवक्ता समेत रहेका सञ्चार तथा सूचना प्रविधि मन्त्री पृथ्वीसुब्बा गुरुङका अनुसार जनपदतर्फका डीआईजी किरण राणा सोही समूहतर्फको एआईजीपी पदमा बढुवा गरेर प्रदेश समन्वय विभागको प्रमुख पदमा पस्थापन भएको छ ।

यद्यपी एआईजीमा बढुवा भएकी राणा बिहीबारदेखि अनिवार्य अवकाशमा जाने भएकाले बुधबार दर्ज्यानी चिन्ह प्राप्त गरेर एक दिन एआईजीपीको भूमिका निर्वाह गरेर बिदाइ हुनेछिन् ।

यस्तै, प्राविधिकतर्फ प्रहरी अस्पताल महाराजगञ्जका निमित्त कार्यकारी निर्देशक डीआईजीपी सुन्दरप्रसाद हैजु सोही सेवा तथा समूहतर्फको एआईजीपीमा बढुवा भएर अस्पतालको निर्देशक पदमा पदस्थापन भएका छन् । यस अघि अस्पताल निर्देशको जिम्मेवारीमा रहेकी एआईजीपी आशा सिंह अनिवार्य अवकाशमा गएपछि अस्पताल निर्देशकको पद रिक्त रहेको थियो ।