धुलिखेल, २५ असारः गएराति सिन्धुपाल्चोकको बाह्रबिसे क्षेत्रमा अरनिको राजमार्ग नै बगाउने गरी भोटेकोशी नदीको बाढीमा बेपत्ता भएकाहरको खोजी र उद्धार कार्यका लागि हेलिकप्टर प्रयोग गरिने भएको छ । प्रमुख जिल्ला अधिकारी उमेश कुमार ढकालको अध्यक्षतामा आज बसेको विपद् ब्यवस्थापन समिति, कमाण्ड पोष्टको आपतकालिन बैठकले घाइतेको उद्धारमा हेलिकप्टर प्रयोग गर्ने निर्णय गरेको हो ।

प्रशासन कार्यालयले प्रारम्भिक जानकारी भन्दै बाह्रबिसे गाउँपालिकाका १४ जना र भोटेकोशी गाउँपालिकाका ४ जना गरी १८ जना बेपत्ता भएको जनाएको छ । अविरल वर्षासँगै आएको पहिरोले बाह्रबिसे नगरपालिका वडा नम्बर ५ जम्बुमा ११ वटा घर बगाएको छ । २ जनाको शव फेला परेको छ भने ३ जना घाइते छन् । १४ जना बेपत्ता छन् ।

त्यस्तै भोटेकोशी गाउँपालिका वडा नम्बर ५ लाम्बोटेमा पहिरोले २ वटा घर बगाएको जिल्ला प्रशासकन कार्यालय सिन्धुपाल्चोकले जनाएको छ । लाम्बोटेका ४ जना बेपत्ता छन् भने २ जना घाइते भएका छन् ।

पहिरोमा पुरी बेपत्ता भएकाहरुको खोजीका लागि नेपाल प्रहरी, सशस्त्र र नेपाली सेनाले खोजी भइरहेको छ । त्यस्तै घरबार बिहीन भएकाहरुलाई तत्काल त्रिपाल, भाँडाकुडा नेपाल रेडक्रस सोसाइटी सिन्धुपाल्चोक मार्फत विरतण गर्ने पनि बैठकले निर्णय गरेको छ ।

बैठकले अवरुद्ध अरनिको राजमार्ग लगायतका सडक स्काभेरट प्रयोग गरी पहिरो हटाएर सडक सञ्चालनमा ल्याउन सडक डिभिजन कार्यालय चरिकोटलाई आग्रह गरेको छ । त्यस्तै मानवीय तथा भौतिक क्षतिको वितरण संकलन, उद्धार, खोजी तथा राहत वितरण कार्यको संयोजक गर्न र विभिन्न निकायहरुमा सूचना आदान प्रदान तथा समन्वय गर्न प्रशासन कार्यालयमा कमाण्ड पोष्ट स्थापना गर्ने निर्णय भएको प्रशासकीय अधिकृत सुनिता पहरीले जानकारी दिनुभयो ।