धुलिखेल, २६ जेठः काभ्रेको बनेपा नगरपालिका वडा नम्बर ९ स्थित तला हिटीमा रहेको गणेशको मुर्ती चोरी भएको छ । गएराती मुर्ती चोरी भएको नेवा गुठी समाज बनेपाका सदस्य सुमन रञ्जितले जानकारी दिए ।

उनका अनुसार आज विहान मुर्ती रहेको ठाउँमा हेर्दा नदेखेपछि चोरी भएको पत्ता लागेको हो । कसले चार्यौ भन्ने बारेमा केहि पत्ता नलागेको उनले बताए । स्थानीयहरुले मुर्ती खोजिन वडा कार्यालय र प्रहरीमा निवेदन दिने तयारी गरिरहेका छन् । ‘विहानै हेर्दा मुर्ती देखिएन, सदस्य रञ्जितले भने ‘साविककाे ठाउँमा मुर्ती नभएपछि पुजा गर्ने स्थानीयहरू चिन्तित हुनुहुन्छ । ’

मौलिक गणेशको मुर्ती चोरी भएपछि स्थानीयहरु चिन्तित बनेका छन् । बनेपाका पुरानो बस्तीहरुमा रहेका देवी देवताको मुर्ती यस अघि पनि चोरी हुदैँ आएका छन् । कतिपय ठाउँका मुर्ती अहिलेसम्म पत्ता लाग्न नसकेको गुठीका अध्यक्ष जनिल मानन्धरले बताए । ‘बनेपामा यस अघि पनि थुप्रै ऐतिहासिक मुर्तीहरु चोरी भएका छन्, अध्यक्ष मानन्धरले भने ‘कतिपय मुर्ती त अहिलेसम्म पनि फेला परेको छैन ।’