धुलिखेल, ८ चैतः काभ्रेको महाभारत गाउँपालिका वडा नम्बर ५ का भुकम्पप्रभावितलाई घर निर्माण सम्पन्नको प्रमाणपत्र दिन सुरु गरिएको छ । पुर्ण क्षतिको लाभग्राहिमा परेर घर निर्माण सम्पन्न गरेका मध्ये ५० जनालाई प्रमाणपत्र दिइसकेको वडाध्यक्ष रविन मोक्तानले जानकारी दिए ।

वडा नम्बर ५ मा ३ सय ६१ घरधुरी लाभग्राहि छनौट भएका मध्ये ३ सय १९ घर निर्माण भइरसकेको छ । ३ सय ५६ जनाले पहिलो किस्ता लिएका थिए । ३ सय १९ जनाले दोस्रो किस्ता लिएका छन् भने ३ सय ८ जनाले अन्तिम किस्ता बापतको रकम लिएको वडाध्यक्ष मोक्तानले बताए ।

वडामा ३३ जना प्रवलीकरणका लाभग्राहि छनौट भएका थिए । पालिकाको ८ ओटा वडा मध्ये ५ नम्बर वडामा सबैभन्दा छिटो घर निर्माण सम्पन्न भएका हुन् ।