काठमाडौँ । स्वतन्त्र विद्यार्थी यूनियन (स्ववियू), त्रिचन्द्र बहुमुखी क्याम्पसले जेन्जी आन्दोलनसँग सम्बन्धित सत्य तथ्य सार्वजनिक गराउन दबाब सिर्जना गर्ने उद्देश्यले हस्ताक्षर संकलन अभियान सुरु गरेको छ।

मंगलबार बिहानदेखि सुरु गरिएको उक्त अभियानमार्फत स्ववियूले जेन्जी आन्दोलनको घटनाक्रमबारे स्पष्टता ल्याउन माग गरेको हो। यसका लागि गठित गौरी बहादुर कार्की आयोग को प्रतिवेदन सार्वजनिक गर्न प्रमुख माग राखिएको छ।

स्ववियूका अनुसार आयोगको प्रतिवेदन सार्वजनिक नभएसम्म आन्दोलनसँग सम्बन्धित वास्तविकता बाहिर नआउने भएकाले नागरिकस्तरबाट दबाब आवश्यक भएको हो। अभियानमा विद्यार्थी, सरोकारवाला तथा सर्वसाधारणको उल्लेख्य सहभागिता रहने अपेक्षा गरिएको छ।

संकलित हस्ताक्षरहरू चाँडै नै प्रधानमन्त्री सुशीला कार्की समक्ष बुझाइने स्ववियूले जनाएको छ।