धुलिखेल, २५ फागुनः प्रहरीलाई घुसदिन खोज्ने टिपर चालकलाई इलाका प्रहरी कार्यालय बनेपाले नियन्त्रणमा लिएको छ । प्रहरी चौकी साँगाले चेकजाँच गर्ने क्रममा आइतबार बिहान कागजपत्रको सट्टा एकसय रुपैयाँ घुस दिन खोज्ने टिपर चालकलाई प्रहरीले नियन्त्रणमा लिएको हो ।

पक्राउ पर्नेमा बा ५ ख ८७९४ नम्बरको टिपर चालक रामेछाप जिल्लाको खाडादेवी गाउँपालिका वडा नम्बर ९ का सरोज तामाङ छन् । उनी भण्कुण्डेबेशीबाट गिट्टी लिएर काठमाण्डौ जादैँ थिए ।

उनलाई अभद्र ब्यवहार अन्तर्गत मुद्दा दर्ता गरिने इलाका प्रहरी कार्यालय बनेपाका प्रहरी निरीक्षक योगेन्द्र तिमल्सिनाले बताए । ‘सार्वजनिक बिदा परेकाले अदालतबाट म्याद थप गर्न समस्या परेको छ, उनले भने ‘चालकलाई अभद्र ब्यवहार अन्तर्गत मुद्दा दर्ता हुन्छ ।’