धुलिखेल, ११ माघः काभ्रेको धुलिखेल नगरपालिका वडा नम्बर १२ शंखुमा सडक शिलान्यास गरिएको छ । ग्वार्को–लाकुरीभञ्ज्याङ–पनौती–दाहालटार–शंखु–एक्लेखेत–पिपलटार–चौकीडाँडा सडकको शंखु खण्डमा निर्माण हुन लागेको सडक प्रदेश सांसद चन्द्र लामा र धुलिखेल नगरपालिकाका प्रमुख अशोक कुमार ब्याञ्जुले शनिबार शिलान्यास गरेका हुन् ।

प्रदेश सरकारको ३ करोड आर्थिक सहयोगमा सडक निर्माण हुनेछ । दाहालटार देखि एक्लेखेतसम्म ६ सय मिटर सडक पिच हुनेछ । सडक ११ मिटर चौडाईको बन्नेछ । ठेकेदार मार्फत निर्माण हुने सडक यसै आर्थिक वर्षभित्र पुरा हुने धुलिखेल नगरपालिकाका भूमि ब्यवस्थापन तथा भवन नियमन शाखाका प्रमुख इन्जिनियर हरेराम हुमाँगाईले जानकारी दिए ।

ग्वार्को–चौकीडाँडा सडकलाई सरकारले राष्ट्रिय राजमार्गको रुपमा घोषणा गरेको छ । सडकको ठेक्का डिभिजन सडक कार्यालय भक्तपुर मार्फत भएको हो । सडकको रेखदेख पनि डिभिजन सडक कार्यालयले नै गर्ने छ ।