धुलिखेल, १७ पुसः काभ्रेको मण्डनदेउपुर नगरपालिका वडा नम्बर १०, तीनधारामा एकीकृत बस्ती निर्माणको काम शुरु भएको छ । आज जिल्ला आयोजना कार्यान्वयन इकाई (भवन) नगरपालिका र एकीकृत बस्ती निर्माण उपभोक्ता समिति बीच सम्झौता गरिएको छ ।

त्रिपक्षीय सम्झौतामा जिल्ला आयोजना कार्यान्वयन इकाई (भवन) का प्रमूख महालक्ष्मी जोशी, नगरप्रमूख टोक बहादुर वाइबा र उपभोक्ता समितिका अध्यक्ष आइतमान तामाङले हस्ताक्षर गरेका छन् ।

एकीकृत बस्तीलाई होमस्टेको रुपमा विकास गरिने छ । तामाङ समुदायको मात्रै बसोबास रहेको तीनधारामा ३० ओटा घर निर्माण हुनेछन । यी घर निर्माणका लागि १४ जना जग्गाधनीले आफ्नो नाममा श्रेस्ता कायम भएको जग्गा एकीकृत बस्ती निर्माण उपभोक्ता समितिको नाममा मञ्जुरी दिने छन् । भूकम्पले सबै घर भत्काएपछि तीनधाराका स्थानीय नमूना एकीकृत बस्ती निर्माणमा जुटेका हुन् ।

यसैबीच मण्डनदेउपुर नगरपालिकाभित्र ६८ प्रतिशत घर पुनःनिर्माण भएको छ । आज नगरपालिकामा भएको छलफलमा दिइएको जानकारी अनुसार १२ वटा वडा रहेको नगरपालिकामा ६८ प्रतिशत घर निर्माण सकिएको हो । नगरपालिकामा ९ हजार ८१ लाभग्राहि छनौट भएका थिए ।