काठमाण्डौ, १० असोज :  वर्षदिनमा एकपटक आउने दशैलाई जंगलमा निर्भर रहँदै आएका राउटे समुदायले पनि रमाइलो गरी मनाउँछन् । तर उनीहरुलाई यो पर्व मनाउन हरेक वर्ष खर्चको समस्या हुन्छ । दशै खर्च संकलन गर्न दैलेखबाट निस्किएका राउटेको समुहले दाङमा पुगेर २७ हजार खर्चको जोहो गरेका छन् । उनीहरुलाई घोराही उपमहानगरपालिकाले दशैँ खर्चका रुपमा २० हजार रुपैयाँ प्रदान गरेको छ । त्यसैगरी जिल्ला प्रशासन कार्यालय दाङले पनि ७ हजार रुपैयाँ उपलब्ध गराएको छ । राउटेको अर्को टोली दशैं खर्च जोहो गर्न काठमाडौं निस्किएको छ । संकलित रकमलाई राउटेले नयाँ कपडा, खसीबोका, खाद्यान्न, मरमसला लगायतमा खर्च गर्छन् ।

सरकारले लोपोन्मुख समुदायको सूचीमा रहेका राउटेहरुलाई मासिक रुपमा सामाजिक सुरक्षा भत्ता पनि दिँदै आएको छ । जंगलमा बस्ने, जंगलकै कन्दमूल तथा जीवजन्तुहरु मारेर खाने राउटेहरुको दैनिकी बन्दै आएको छ । सहायक मुखिया नारायणबहादुर शाहीको नेतृत्वमा बिहीबार बेलुका दाङ पगुेका राउटेहरु दशैँ खर्चका लागि शुक्रबार दाङका विभिन्न सरकारी कार्यालयमा सहयोग माग्दै पुगेका थिए ।

दैलेखको एउटा जंगलमा बस्दै आएका झण्डै २ सय जना राउटेलाई दशैँ मनाउन १० वटा खसी बोका चाहिने सहायक मुखीया शाहीले बताएका छन् । दशैँमा टीका लगाउने, नयाँ कपडा किन्ने, मासु खाने भन्दै उनीहरु अहिले विभिन्न जिल्लामा दशैँ खर्च जुटाउन हिँडेका हुन्।