काठमाडौं ११ भदौ : सञ्चार तथा सूचना प्रबिधि मन्त्री गोकुल बास्कोटाले काभ्रे जिल्लाको शहरी विकासका बारे छलफल थालेका छन् ।

मन्त्री बास्कोटाले मंगलबार शहरी बिकास मन्त्रालयका सचिव मधुसूदन अधिकारी, सहरी तथा भवन निर्माण बिभागका महानिर्देशक मणिराम गेलाल, जिल्ला आयोजना कार्यान्वयन इकाईका प्रमुख तथा प्राबिधिकसँग काभ्रे जिल्लामा सञ्चालनमा रहेका र सञ्चालन गर्न सकिने शहरी विकास परियोजनाका बारे छलफल थालेका हुन ।

मन्त्री बास्कोटाले आफ्नै मन्त्रालयमा सहरी विकाससँग सम्बन्धीत सरोकारवाला निकायलाई बोलाएर छलफल गरेको उनको नीजि सचिवालयले जनाएको छ । मन्त्री बास्कोटा आफ्नै परिकल्पना गरेको पुण्यामाता करिडोरका बारे विशेष छलफल भएको थियो ।

छलफलमा करिडोरको डिपिआर गत वर्षमै सकिएको र चालु आर्थिक वर्षमा ठेक्का प्रक्रियामा जाने प्रतिबद्धता व्यक्त गरेको सहरी विकास मन्त्रालयले जनाएको छ । त्यसै गरी काभ्रे जिल्लाकै अर्को महत्वपुर्ण परियोजनाहरु काभ्रे भ्याली एकीकृत खानेपानी आयोजना र पनौती क्षेत्रीय रंगशालाको पनि प्रगति विवरण, बर्तमान अवस्था, समस्याका बारे गहन छलफल भएको छ ।

मन्त्री बास्कोटासँगको छलफलमा बनेपा, धुलिखेल, पनौती लगायत नगरपालिकाको फोहोर ब्यबस्थापन गर्न सडक मार्ग निर्माण गर्न र हिले जलजले लगायत बैकल्पिक खानेपानी ब्यबस्थापन सहितको बहुउद्देश्यीय परियोजनाको लागी थप कार्य अगाडि बढाउन बिभागले प्रतिबद्धता ब्यक्त गरेको छ ।

छलफलमा मन्त्री बास्कोटाले सबै परियोजनालाई समयमै कार्यसम्पादन गर्न सहरी विकास मन्त्रालयका सचिव, बिभागका महानिर्देशक र परियोजनाका टिमलाई निर्देशन दिए । उनले परियोजना कार्यान्वयनका बेला आइपर्ने समस्या समाधानमा आवश्यक सहयोग र सहजीकरणको गर्ने प्रतिबद्धता समेत ब्यक्त गरे ।

काभ्रे निर्वाचन क्षेत्र नम्बर २ बाट संघीय सांसदमा निर्वाचित बास्कोटा मन्त्री भएपछि पहिलो पटक जिल्लामा सञ्चालित र सञ्चालन हुने परियोजनाका बारे सचिव स्तरीय छलफल गरेका हुन् ।