नुवाकोट, १७ पुस : विदुर नगरपालिका–१० गेर्खुटारस्थित ढाडखर्क खोलामा सडक विस्तारका क्रममा आएको पहिरोमा परी एक महिला बेपत्ता हुनुभएको छ । आज साँझपख विदुर–१० गैरीखर्ककी ७२ वर्षीया ठूली तामाङ पहिरोमा परी बेपत्ता हुनुभएको उहाँका श्रीमान् प्रेमबहादुर तामाङले जानकारी दिनुभयो । सडक विस्तारको काम भइरहेका बेला स्काभेटर रोकेर पैदल यात्रु पास गराउने क्रममा माथिबाट खसेको पहिरामा परेर उहाँ बेपत्ता हुनुभएको हो ।

स्थानीय र प्रहरीले बेपत्ता ठूलीको खोजीकार्य गरिरहेको जिल्ला प्रहरी कार्यालयका प्रहरी नायब उपरीक्षक भीमलाल भट्टराईले जानकारी दिनुभयो । पहिरामा परेकी अर्की एक महिलाको भने जीवतै उद्धार गरी उपचारका लागि त्रिशूली अस्पताल पठाइएको स्थानीय शिक्षक मुकुन्द नेपालले जानकारी दिनुभयो ।
-रासस