धुलिखेल । काभ्रेको पाँचखाल नगरपालिका १२ कासकोटे बालुवामा तीजका दर खाँदा प्रदेश सभा सांसद गोमा भूर्तेल सहित २ सय भन्दा बढी स्थानीय महिलाहरु विरामी परेका छन् ।

शुक्रबार ग्रामीण स्वावलम्वन बहुउद्देश्यीय सहकारी संस्थाले तीजको अवसरमा दर खुवाउने कार्यक्रमको आयोजना गरेको थियो । उक्त दर कार्यक्रममा दर खाएपछि २ सयभन्दा बढी बिरामी परेको सस्थाका अध्यक्ष भैरब सेडार्इंले बताएका छन् ।

बिरामी भएकाहरुको अहिले काभ्रेको पाँचखाल, बनेपा र धुलिखेलमा उपचारका लागि लगिएको छ । पाँचखालको तीनघरेमा उपचारको लागि शीविर नै सञ्चालन गरिएको छ । स्रोतका अनुसार भूमिगत इनारको पानीका कारण दर खानेहरुलाई फुड पोइजन भइ बिरामी भएको आशंका गरिएको छ ।

घटना भएपछि प्रशासनले प्रहरीको टोली खटाएको छ भने राजनीतिक दलका नेता कार्यकर्ता, स्थानीय जनप्रतिनिधिहरु विरामीहरुको उपचार र उद्दारका लागि जुटेका छन् । बिरामी भएकाहरुमा महिला, पुरुष र बालबालिकाहरु छन् । उनीहरुलाई फुड प्वार्इजन भएको र सबैजना बोल्न सक्ने अवस्थामा रहेको प्रहरी श्रोतले बताएको छ ।

बिरामी भएकाहरुको धुलिखेल सामुदायिक अस्पताल र शिरमेमोरियल अस्पतालमा उपचार भैरहेको एसपी रविराज खड्काले जानकारी दिए । केहीको पाँचखालस्थित गौतम मेडिकल र सदीप मेडिकलमा उपचार भइरहेको छ ।