सूचना, सञ्चार तथा प्राविधि मन्त्री गोकुल बास्कोटाले पत्रकारिता क्षेत्रको पनि सिण्डिकेट हटाउने बताएका छन् । सोमबार काभ्रेको चण्डेनीमा हिगुवापाटी–ज्याम्दी–दोलालघाट सडकको शिलान्यास गर्दै मन्त्री बास्कोटाले पत्रकारिताको सिण्डिकेटले देशको पुरै विकास पद्धतिलाई अबरुद्ध पुर्याइरहेको भन्दै सिण्डिकेटको जालो तोडेरै छाड्ने बताए ।

मन्त्री बास्कोटाले समयमै काम नगर्ने जो कोहि ठेकेदार पनि उम्कन नपाउने भन्दै आफ्नो गाउँ टोलमा आएको विकास प्रभावकारि अनुगमन गर्न आग्रह समेत गरे । ‘काम समयमै नसक्ने कोहि पनि ठेकेदारलाई जोगाईने छैन्, उनले भने ‘राज्यको पैसा दुरुपयोग गर्ने छुट कसैलाई छैन् ।’ गाउँमा आएको विकासले खेत बारी मासियो भनेर आन्दोलन र चिन्ता नगर्न आग्रह गर्दै मन्त्री बास्कोटाले विकासले मानिसलाई मालिक बनाउने समेत दाबी गरे । उनले देशका सबै क्षेत्रमा रहेको सिण्डिकेट हटाउन यो सरकार कठिबद्ध रहेको भन्दै कोहि पनि नागरिक छाना बाहिर नरहने ब्यवस्था गरिएको बताए ।

सरकारका प्रवक्ता समेत रहेको मन्त्री बास्कोटाले निर्माणको युग सुरु भएको भन्दै भ्रष्टचार अब एकादेशको कथा बन्ने उल्लेख गरे । सरकारले हो–हल्ल्ला र चमकदमक कुरा नगर्ने भन्दै काम गरेर देखाउने दाबी समेत गरे । उनले ८ प्रतिशत भन्दा बढी आर्थिक बृद्धिदर पुर्याउने योजना पनि सुनाए । ‘अहिले हामीले ८ प्रतिशत आर्थिक बृद्धिदर हुन्छ भनेर भनेका छौँ, उनले भने ‘यो हाम्रो लक्ष्य मात्रै हो, त्यो भन्दा बढी आर्थिक बृद्धिदर सरकारले गराएर देखाउँछ ।’ लोकतन्त्र र गणतन्त्र सबैको साझा एजेण्टा भएको भन्दै उनले लोकतन्त्र रहदैँ कि भनेर गनगन नगर्न प्रतिपक्ष दल नेपाली काँग्रेसलाई आग्रह गरे ।