काठमाडौं, असोज २५: गोंगबु बसपार्क पुगेका अर्घाखाँचीका सयौज पोख्रेल टिकट काउन्टरमा पुग्नुभयो । अर्घाखाँची सन्धीखर्कका लागि टिकट दिनुस् भनेर काउन्टरका कर्मचारीसँग टिकट माग्नुभयो । काउन्टरका कर्मचारीले भने– ‘२७ गतेको टिकट प्याक छ । बिहानै आउनुहोला । गाडी थप गर्छौं ।’ अन्ततः सयौज टिकट नै नलिई रित्तै हात फर्किनुभयो ।

घर जान टिकट लिन बसपार्क पुगेका केशव पाण्डेले भन्नुभयो– ‘के गर्नु अग्रिम टिकट पूरै प्याक छ भनेर जवाफ पाएँ । अब क्याबिनमा मात्रै सिट छ रे ? क्याबिनमा त सात जनासम्म राख्छ । पोहोर पनि दुःख पाएको हुँ क्याबिन भनेर ।’ रोल्पा लिवाङ जाने तयारीमा रहेका पाण्डे पनि केही समय अलमलिए तर, टिकट पाएनन् असोज २९ को । अग्रिम टिकट लिएकाहरुको टिकटमा गते र रकम खुलाइए पनि गाडी नम्बर भने खुलाइएको छैन । त्यसका लागि टिकटमा प्रस्थानका लागि उल्लेख गरिएको गतेको एक घण्टा अघि बसपार्क पुगिसक्नुपर्ने काउन्टरका कर्मचारीले जनाएका छन् ।

दशैं नजिकिँदै गर्दा टिकटमा मनलाग्दी हुने गरेको पाइएको छ । टिकट काउन्टरमा बस्दै आएकाले आफन्तीलाई फोनको भरमा टिकट दिने गरेका छन् । टिकट काउन्टरका कर्मचारीसँग परिचित नभएका यात्रुले सहज रुपमा टिकट पाउन सकेका छैनन् । नेपाल समाचारपत्रको टिम बसपार्क पुग्दा टिकट काउन्टरमा कार्यरत कर्मचारीले फोन आएकै भरमा आफ्नो सर्टको गोजीबाट पाँचवटा अग्रिम टिकट आफ्ना नजिकका मान्छेलाई उपलब्ध गराएका थिए ।

१६ लाख यात्रु राजधानी बाहिरिए
यात्रुका लागि सहजता प्रदान गर्न भन्दै बसपार्कमा सामुदायिक सेवा केन्द्र र प्रहरीको संयुक्त टोली खटिएको छ । तर सो टोलीले पनि खासै उपलब्धिमूलक काम हुन सकेको छैन । दुःख पाउनेहरुले दुःख पाएकै छन् ।

महानगरीय प्रहरी प्रभाग बसपार्कका प्रहरी प्रमुख, प्रहरी निरीक्षक मोहनकुमार केसीले नेपाल समाचारपत्रसंग भन्नुभयो– ‘प्रहरी टोलीले यात्रुहरुका गुनासा सम्वोधन गरिरहेको छ । चोरी, पाकेटमार नहोस् भनेर बसपार्क क्षेत्रमा कडा निगरानी गरेका छौं । नागरिक सहायता कक्षमा दैनिक एक हजार जनासम्म आजभोलि आउने गर्नुभएको छ ।’ विगतमा जस्तो यस वर्ष घटनाहरु नघटेको उहाँको भनाइ छ ।

यसैबीच १६ लाख यात्रुहरु राजधानी बाहिरिएको नेपाल यातायात व्यवसायी राष्ट्रिय महासंघका सचिव सुरेन्द्र सिटौलाले नेपाल समाचारपत्रलाई जानकारी दिनुभयो । उहाँले भन्नुभयो– ‘अहिलेसम्म राजधानीबाट ७० प्रतिशत बाहिरिएका छन् । सरकारले गरेको बिदा कटौती, काउन्टरमा गएर एकै ठाउँमा सोध्ने प्रवृत्ति भएका कारण पनि टिकट नपाइएको हुन सक्छ । तर, टिकट सजिलै पाइन्छ ।’

दशैंको समयमा गाडीहरु थप नगरेको तर, पश्चिममा चल्ने सवारीहरुको संख्या केही बढाइएको नेपाल राष्ट्रिय यातायात व्यवसायी महासंघका सचिव सिटौलाले बताउनुभयो । यस्तै, नेपाल यातायात व्यवसायी राष्ट्रिय महासंघका वरिष्ठ उपाध्यक्ष हरिशरण केसीको संयोजकत्वमा २२ सदस्यीय अनुगमन टोली खटाइएको छ । सरकारले १० प्रतिशत गाडीभाडा बढाएपछि नेपाल राष्ट्रिय यातायात व्यवसायी महासंघले गत असोज १० देखि टिकट बुकिङ खुला गर्ने निर्णय गरेको थियो ।

मंगलबारदेखि सार्वजनिक सवारी साधनलाई इजाजतपत्र (रुट परमिट) खुला भएको छ । दशैंका लागि भन्दै यातायात व्यवस्था विभागले जुनसुकै रूटका सार्वजनिक सवारी साधनलाई ३१ असोजसम्म निर्वाध रूपमा देशभरि सञ्चालन गर्न दिन रूट परमिट खुला गरेको हो ।
-नेपाल समाचार पत्र