काठमाडौं । नेपाली कांग्रेसको उपसभापति पदमा चन्द्र भण्डारी, मधु आचार्य र विनोद चौधरी निर्वाचित भएका छन्। खुलातर्फ चन्द्र भण्डारी र मधु आचार्य विजयी हुँदा समावेशी उपसभापतिमा विनोद चौधरी निर्वाचित भएका हुन्।

उपसभापति पदमा चन्द्र भण्डारीले सर्वाधिक ३ हजार ७३५ मत प्राप्त गरेका छन्। मधु आचार्य २ हजार ३४२ मतसहित निर्वाचित भएका छन् भने समावेशी उपसभापतिमा विनोद चौधरीले १ हजार ७४५ मत प्राप्त गरेका छन्।

खुला उपसभापति पदका अन्य प्रतिस्पर्धीमध्ये गोविन्द भट्टराईले १ हजार ७५२, सुरेन्द्रराज पाण्डेले १ हजार ६७३, धनराज गुरुङले १ हजार ५९६, दीपक गिरीले ९२३ र प्रा.डा. चन्द्रमोहन यादवले ७६० मत प्राप्त गरेका छन्।

त्यस्तै, समावेशी उपसभापति पदमा प्रतिस्पर्धा गरेका जीवन परियारले १ हजार ६५८, फरमुल्लाह मन्सुरले १ हजार १४४, सीता गुरुङले १ हजार ११२ र रञ्जित कर्णले ५६२ मत प्राप्त गरेका छन्।

महिला उपसभापतिमा पुष्पा भुसाल यसअघि नै निर्विरोध निर्वाचित भइसकेकी छन्। वरिष्ठ उपसभापति पदमा विश्वप्रकाश शर्मा पनि निर्विरोध निर्वाचित भएका छन्।

कांग्रेसको संशोधित विधानअनुसार वरिष्ठ उपसभापतिसहित पाँच जना उपसभापति रहने व्यवस्था छ।

यसैगरी, नेपाली कांग्रेसको महामन्त्रीमा प्रदीप पौडेल, उदयशमशेर राणा र डिला संग्रौला निर्वाचित भएका छन्।