काठमाडौं । मनसुनको प्रभाव कायमै रहेकाले आज देशका हिमाली तथा पहाडी क्षेत्रमा मौसम बदलीसँगै वर्षाको सम्भावना रहेको छ । मनसुनको न्यून चापीय रेखा सरदर स्थान आसपास रहनुका साथै पश्चिमी वायु र भारतको उत्तर प्रदेश आसपासको न्यूनचापीय क्षेत्रको प्रभाव नेपालमा देखिएको छ ।

मौसम पूर्वानुमानअनुसार आज दिउँसो देशभर आंशिक बदली रहनेछ । हिमाली भूभागका एक–दुई स्थान र पहाडी भूभागका केही स्थानमा मेघगर्जन तथा चट्याङसहित मध्यम वर्षा हुन सक्नेछ । हिमाली क्षेत्रमा हिमपातको समेत सम्भावना छ ।

तराईका अधिकांश क्षेत्रमा भने मौसम मुख्यतः सफा रहने अनुमान गरिएको छ । राति हिमाली र पहाडी क्षेत्रमा आंशिक बदली कायम रहने भए पनि तराईमा मौसम सामान्यतया सफा रहनेछ ।

वर्षासँगै चट्याङ र पहाडी क्षेत्रमा पहिरोको जोखिम हुन सक्ने भएकाले यात्रा तथा दैनिक कामकाज गर्दा आवश्यक सावधानी अपनाउन मौसमविद्ले आग्रह गरेका छन् ।