हेटौंडा । बागमती प्रदेशका मुख्यमन्त्री इन्द्रबहादुर बानियाँले राजीनामा दिएका छन्। सोमबार प्रदेशसभा बैठकमा विश्वासको मतको प्रस्ताव पेस गर्ने क्रममा सम्बोधन गर्दै उनले मुख्यमन्त्री पदबाट राजीनामा घोषणा गरेका हुन्।

राजीनामा घोषणा गर्नुअघि बानियाँले आफ्नो एक वर्षे कार्यकालमा प्रदेश सरकारले गरेका प्रमुख काम तथा उपलब्धि २८ बुँदामा प्रस्तुत गरेका थिए। नेकपा एमालेले गत ६ साउनमा प्रदेश सरकारलाई दिएको समर्थन फिर्ता लिएपछि मुख्यमन्त्री बानियाँले संवैधानिक व्यवस्थाअनुसार ३० दिनभित्र प्रदेशसभाबाट विश्वासको मत लिनुपर्ने अवस्था बनेको थियो। सोहीअनुसार उनले सोमबार विश्वासको मत लिने तयारी गरेका थिए।

तर, विश्वासको मत लिने प्रक्रिया अघि बढाउँदै गर्दा उनले पदबाट राजीनामा घोषणा गरेका हुन्। बानियाँको राजीनामासँगै बागमती प्रदेशमा नयाँ सरकार गठनको बाटो खुलेको छ। अब प्रदेशमा नयाँ सत्ता समीकरण निर्माण गर्ने प्रक्रिया अघि बढ्नेछ।