काठमाडौं । चीनको पूर्वी तटीय क्षेत्रमा शक्तिशाली टाइफुन ‘डल्फिन’ प्रवेश गरेपछि १३ लाखभन्दा बढी मानिसलाई सुरक्षित स्थानमा सारिएको छ। झेजियाङ प्रान्तको युहुआनमा करिब १५० किलोमिटर प्रतिघण्टाको वेगसहित जमिनमा प्रवेश गरेको आँधी त्यसको केही समयपछि वेनझाउ पुगेको चिनियाँ मौसम विभागले जनाएको छ।

आँधीका कारण जनजीवन र यातायात अस्तव्यस्त बनेको छ। सांघाईमा मात्रै करिब १ हजार ४ सय उडान रद्द गरिएका छन्। पर्यटकीय क्षेत्र, डिज्नील्यान्डका केही भाग र लेगोल्यान्डसमेत बन्द गरिएको छ। वेनझाउबाट करिब ९ लाख र ताइझाउबाट ३ लाख ९० हजार मानिसलाई सुरक्षित स्थानमा सारिएको छ। एक हजारभन्दा बढी आपत्कालीन आश्रयस्थल सञ्चालनमा ल्याइएको अधिकारीहरूले बताएका छन्।

आँधी भित्री भू–भागतर्फ अघि बढेसँगै बाढी, पहिरो र भारी वर्षाको जोखिम बढेको छ। झेजियाङका केही क्षेत्रमा आगामी दिनमा २५० देखि ५०० मिलिमिटरसम्म वर्षा हुन सक्ने चेतावनी दिइएको छ।

यसैबीच, वेनलिङका ९ वर्षीय बालक आँधीका कारण समुद्रमा बगेपछि बेपत्ता भएका छन्। हालसम्म ठूलो मानवीय क्षतिको आधिकारिक पुष्टि भएको छैन। चिनियाँ सरकारी सञ्चारमाध्यमका अनुसार ‘डल्फिन’ करिब ६ हजार किलोमिटर यात्रा गरेर चीन पुगेको हो। आँधीबारे भ्रामक तथा एआईबाट सिर्जित सामग्री फैलाएको आरोपमा दुई जना पक्राउसमेत परेका छन्।