जनकपुरधाम । केन्द्रमा नेपाली कांग्रेस र नेकपा (एमाले) बीचको सम्बन्धलाई लिएर बढेको राजनीतिक तरंगले मधेश प्रदेश सरकारको भविष्यबारे पनि अनेक अड्कलबाजी सुरु भएको छ। यद्यपि सत्ता साझेदार दलका प्रदेशस्तरीय नेताहरूले गठबन्धन परिवर्तनबारे कुनै आधिकारिक निर्णय वा निर्देशन नआएको बताएका छन्।

सातै प्रदेशमा कांग्रेस–एमाले सहकार्य पुनरावलोकन हुने चर्चा चलिरहेका बेला मधेश प्रदेशमा पनि सरकार फेरबदलको सम्भावनाबारे राजनीतिक वृत्तमा चासो बढेको हो। तर मुख्यमन्त्री कृष्णप्रसाद यादवले अहिलेको अवस्थामा प्रदेश सरकार सुरक्षित रहेको दाबी गरेका छन्।

मुख्यमन्त्री यादवका अनुसार प्रदेश सरकार परिवर्तन हुने कुनै औपचारिक जानकारी आफूलाई प्राप्त भएको छैन। उनले केन्द्रमा हुने राजनीतिक निर्णयको प्रत्यक्ष प्रभाव प्रदेशमा पर्न सक्ने भए पनि हालसम्म गठबन्धन परिवर्तनको आधार नदेखिएको बताए।

कांग्रेसका प्रदेश सांसद वीरेन्द्रकुमार सिंहले पनि सञ्चारमाध्यममा आएका समाचारबाहेक अन्य कुनै आधिकारिक सूचना नपाएको बताए। उनका अनुसार शीर्ष नेताहरूबीच छलफल भइरहे पनि प्रदेश सरकारबारे स्पष्ट निर्णय भइसकेको छैन।

उता एमाले संसदीय दलका नेता युवराज भट्टराईले पनि सरकार परिवर्तनसम्बन्धी कुनै निर्देशन पार्टीबाट नआएको स्पष्ट पारे। सत्ता गठबन्धनका दलहरूबीच नियमित संवाद भइरहे पनि मधेश सरकारको निरन्तरतामाथि तत्काल प्रश्न उठ्ने अवस्था नरहेको उनको भनाइ छ।

हाल मधेश प्रदेश सरकारमा कांग्रेस, एमाले र नेकपा (एकीकृत समाजवादी) सहभागी छन्। करिब दुई महिनाअघि बनेको यो गठबन्धन सरकार केन्द्रको राजनीतिक समीकरणमा आउने सम्भावित परिवर्तनसँगै पुनः चर्चामा आएको हो।

राजनीतिक वृत्तमा सत्ता समीकरण फेरिने चर्चा भइरहे पनि प्रदेशस्तरका नेताहरू भने अहिले कुनै निष्कर्षमा नपुग्न आग्रह गर्दै केन्द्रको औपचारिक निर्णयको प्रतीक्षामा रहेका छन्।