काठमाडौं । देशमा मनसुन भित्रिए पनि कमजोर अवस्थामा रहेकाले तत्काल उल्लेख्य वर्षाको सम्भावना नदेखिएको मौसमविद्हरूले बताएका छन्। यसैबीच, तराईका विभिन्न क्षेत्रमा तातो लहर (heat wave) र उच्च तापक्रमको जोखिम बढ्ने अनुमान गरिएको छ।

मौसमविद् उज्वल उपाध्यायका अनुसार कम्तीमा बिहीबारसम्म देशभर उल्लेख्य वर्षा हुने सम्भावना न्यून छ। उनका अनुसार पूर्व मेचीदेखि पश्चिम महाकालीसम्मका तराई क्षेत्रमा वर्षा कम र गर्मी बढी रहने अवस्था देखिएको छ।

जल तथा मौसम विज्ञान विभाग, मौसम पूर्वानुमान महाशाखाले लुम्बिनी र सुदूरपश्चिम प्रदेशका तराईका केही स्थानमा तातो लहरको सम्भावना रहेको जनाएको छ। साथै बागमती र गण्डकी प्रदेशका तराई क्षेत्रका केही स्थानमा पनि तापक्रम बढ्ने अनुमान गरिएको छ।

यस वर्षको मनसुन सरदरभन्दा करिब ६ दिन ढिलो गरी असार ५ गते कोशी प्रदेशबाट नेपाल प्रवेश गरेको थियो। असार ८ गतेसम्म यो मधेश, बागमती हुँदै गण्डकी र लुम्बिनी प्रदेशका केही भूभागसम्म विस्तार भए पनि हाल कमजोर अवस्थामा रहेको छ।

महाशाखाका अनुसार हाल कोशी, मधेश र बागमती प्रदेशका धेरै भागमा मनसुनी वायुको प्रभाव रहे पनि अन्य क्षेत्रमा पश्चिमी र स्थानीय वायुको आंशिक प्रभाव देखिएको छ। यसले गर्दा वर्षा प्रणाली अपेक्षित रूपमा सक्रिय हुन सकेको छैन।

मौसमविद्हरूले आगामी केही दिन सावधानी अपनाउन आग्रह गर्दै विशेषगरी तराई क्षेत्रका बासिन्दालाई तातो लहरबाट जोगिन सतर्क रहन सुझाव दिएका छन्।