काठमाडौं । देशभर आज मौसम बदली भई विभिन्न स्थानमा मेघगर्जन र चट्याङसहित वर्षा हुने सम्भावना रहेको छ। जल तथा मौसम विज्ञान विभागका अनुसार विशेषगरी कोशी र गण्डकी प्रदेशका केही स्थानमा मध्यम वर्षा हुने अनुमान गरिएको छ भने अन्य प्रदेशका थोरै स्थानमा पनि वर्षा हुन सक्नेछ।

पहाडी तथा हिमाली भूभागमा सामान्यतया बदली रहनेछ र केही स्थानमा हिमपात समेत हुन सक्ने बताइएको छ। तराई क्षेत्रमा भने आंशिक बदली रहनेछ।

आज राति पनि मौसम पूर्ण रूपमा सुधार नहुने देखिएको छ। कोशी, मधेस, बागमती र गण्डकी प्रदेशमा सामान्य बदली रही केही स्थानमा मेघगर्जनसहित वर्षा जारी रहने सम्भावना छ।

विभागले चट्याङ, हावाहुरी र वर्षाबाट हुन सक्ने जोखिमलाई ध्यानमा राख्दै आवश्यक सतर्कता अपनाउन सर्वसाधारणलाई आग्रह गरेको छ।