काठमाडौँ । गुण्डागर्दीमा संलग्न रहेको आरोपमा प्रहरीले “निरे” भनेर चिनिने निराजन पौडेललाई पक्राउ गरेको छ। जिल्ला प्रहरी परिसर काठमाडौँका अनुसार उनलाई वैशाख ३ गते काठमाडौँ महानगरपालिका–३ बसुन्धारा क्षेत्रबाट नियन्त्रणमा लिइएको हो।

प्रहरीका अनुसार पौडेलमाथि विभिन्न आपराधिक गतिविधिमा संलग्न रहेको आशंका छ। उनी पछिल्लो समय ठेक्कापट्टा व्यवसायमा सक्रिय रहँदै आएका थिए भने मिलन चक्रे समूहसँग आबद्ध भएर गुण्डागर्दीमा संलग्न रहेको आरोप लागेको छ।

पौडेलविरुद्ध यसअघि हातहतियार, ज्यान मार्ने उद्योग तथा अभद्र व्यवहारसम्बन्धी गरी ६ वटा मुद्दा दर्ता भइसकेका छन्। हाल उनी सातौँ मुद्दामा अनुसन्धानको दायरामा परेका छन्।

जिल्ला प्रहरी परिसर काठमाडौँले घटनाबारे थप अनुसन्धान भइरहेको जनाएको छ।