काठमाडौं । संघीय संसद सचिवालय ले प्रतिनिधिसभाका नवनिर्वाचित सांसदलाई शपथ ग्रहण कार्यक्रममा उपस्थित हुन आह्वान गरेको छ। सचिवालयले सार्वजनिक सूचना जारी गर्दै शपथ कार्यक्रम चैत १२ गते बिहीबार दिउँसो २ बजे हुने जानकारी दिएको हो।

शपथ कार्यक्रम सिंहदरबार स्थित निर्माणाधीन संघीय संसद् भवनको बहुउद्देश्यीय सभाकक्षमा आयोजना गरिनेछ।

सचिवालयका अनुसार सांसदहरूले निर्वाचन आयोग बाट प्राप्त प्रतिनिधिसभा सदस्य पदको प्रमाणपत्र (सक्कल र प्रतिलिपि), नेपाली नागरिकताको प्रमाणपत्रको प्रतिलिपि तथा हालसालै खिचिएको पासपोर्ट साइजको दुई प्रति फोटो अनिवार्य रूपमा साथमा ल्याउनुपर्नेछ।

त्यस्तै, सबै सांसदलाई निर्धारित समयभन्दा दुई घण्टा अगावै औपचारिक वा आफ्नो सांस्कृतिक पहिचान झल्किने पोशाकमा उपस्थित हुन अनुरोध गरिएको छ।

नेपाली भाषाबाहेक मातृभाषामा शपथ लिन चाहने सांसदहरूले प्रतिनिधि सभा सदस्य निर्वाचन ऐन, २०७४ को अनुसूची–३ अनुसारको शपथको पाठ सम्बन्धित भाषामा अनुवाद गरी कार्यक्रमभन्दा कम्तीमा तीन दिनअघि सचिवालयमा बुझाउनुपर्ने सूचनामा उल्लेख छ।

यसैबीच, सचिवालयले देशभरका जिल्ला प्रशासन कार्यालयहरूलाई आ–आफ्नो जिल्लाका निर्वाचित सांसदहरूलाई उक्त सूचनाबारे जानकारी गराउन समन्वय गर्न अनुरोध गरेको छ।