काठमाडौं । संखुवासभा प्रतिनिधिसभा निर्वाचन क्षेत्रमा नेकपा एमालेले जित हासिल गरेको छ। एमाले उम्मेदवार डा. अर्जुन कुमार कार्की ६३६ मतको अन्तरले विजयी भएका हुन्।

निर्वाचन परिणामअनुसार कार्कीले १५ हजार ६ सय ३६ मत प्राप्त गरे। उनका निकटतम प्रतिस्पर्धी राष्ट्रिय स्वतन्त्र पार्टी (रास्वपा)का मिङ्मा शेर्पाले १५ हजार मत पाएर दोस्रो स्थानमा सीमित भए।

त्यसैगरी नेपाली कांग्रेसका उम्मेदवार दिपन कुमार श्रेष्ठले १३ हजार २ सय ७१ मत प्राप्त गरेका छन्। यस जितसँगै नेकपा एमालेले हालसम्म देशभर ९ निर्वाचन क्षेत्रमा विजय हासिल गरेको छ। संखुवासभामा सुरुदेखि नै प्रतिस्पर्धा कडा रहे पनि अन्तिम मतपरिणाममा कार्कीले अग्रता कायम राख्दै जित सुनिश्चित गरेका हुन्।