काठमाडौं । आगामी फागुन २१ गते तय गरिएको प्रतिनिधि सभा निर्वाचन नजिकिँदै जाँदा काभ्रेको राजनीतिक माहोल थप तातेको छ। यसैक्रममा काभ्रे नमोबुद्ध नगरपालिका वडा नं. ५ का नेपाली कांग्रेस इकाई सचिव विनोद तामाङ नेकपा एमालेमा प्रवेश गरेका छन्। तामाङ बीपी कोइराला युवा नेतृत्व विकास मञ्च, नमोबुद्ध नगरका निवर्तमान सभापति हुन् ।

नवप्रवेशी तामाङले नेपाली कांग्रेसभित्र नातावाद, कृपावाद र व्यक्तिवाद हावी भएको आरोप लगाउँदै समाज परिवर्तनका सवालमा पार्टीले ठोस उपलब्धि हासिल गर्न नसकेको बताएका छन्। उनले देश र जनताको पक्षमा नेकपा एमालेले उल्लेखनीय योगदान दिएको उल्लेख गर्दै अब त्यस अभियानमा सक्रिय रूपमा लाग्ने प्रतिबद्धता व्यक्त गरे।

तामाङले काभ्रे क्षेत्र नं. १ मा एमालेका प्रतिनिधि सभा सदस्य उम्मेदवार अमित लामा को विकल्प पुनः अमित लामा नै भएको दाबी गर्दै उनको विजय सुनिश्चित रहेको बताए। साथै उनले अब अन्य दलहरूको भविष्य कमजोर बन्दै गएको टिप्पणी गरे।

नवप्रवेशी तामाङलाई नेकपा एमालेका केन्द्रीय सदस्य तथा काभ्रे क्षेत्र नं. १ का प्रतिनिधि सभा सदस्य उम्मेदवार अमित लामाले पार्टीमा स्वागत गरेका छन्। स्वागत गर्दै उम्मेदवार लामाले नवप्रवेशीलाई उचित जिम्मेवारी दिइने प्रतिबद्धता जनाएका छन्।