काठमाडौं । अमेरिकाको टेक्सस राज्यमा बसोवास गर्ने तामाङ समुदायले आफ्नो महान् मौलिक सांस्कृतिक तथा धार्मिक पर्व सोनाम ल्होछार २०८२ भव्य रूपमा मनाउने तयारी थालेका छन्।

मञ्जुश्री संवत् अनुसार मनाइने यो पर्व तामाङ समुदायको संस्कृति, परम्परा र पहिचानलाई प्रवासमा जगेर्ना गर्ने महत्वपूर्ण अवसरका रूपमा लिइएको छ।

यस वर्ष टेक्ससका विभिन्न शहरमा बसोवास गर्ने तामाङ समुदाय एकै स्थानमा भेला भई सामूहिक रूपमा ल्होछार मनाउने तयारीमा जुटेका छन्। पर्वको अवसरमा ड्यालसको इर्भिङस्थित डायमण्ड हल, ब्यान्क्वेट हल इभेन्ट सेन्टरमा विशेष सांस्कृतिक साँझ कार्यक्रम आयोजना गरिने तामाङ समाज टेक्ससले जनाएको छ।

कार्यक्रममा तामाङ समुदायका परम्परागत गीत, नृत्य, वेशभूषा तथा नेपाली सांगीतिक प्रस्तुति प्रस्तुत गरिनेछ। ल्होछारको अवसरमा आपसी शुभकामना आदान–प्रदान गर्दै सांस्कृतिक एकता र सामुदायिक सम्बन्ध सुदृढ बनाउने उद्देश्य राखिएको तामाङ समाज टेक्ससका अध्यक्ष कुमार तामाङले जानकारी दिनुभयो।

आयोजकका अनुसार कार्यक्रममा तामाङ समुदायको मौलिक पहिचान झल्किने विविध सांस्कृतिक प्रस्तुति रहनेछन्। साथै चर्चित कलाकारहरू निर्मला घिसिङ, विजय लामा र रश्मी तामाङको विशेष प्रस्तुति कार्यक्रमको मुख्य आकर्षण रहनेछ।

नेपालमा प्रत्येक वर्ष माघ शुक्ल प्रतिपदाका दिन मनाइने सोनाम ल्होछार प्रवासमा भने कामकाजी जीवनलाई ध्यानमा राख्दै सबैलाई पायक पर्ने बिदाको दिन आयोजना गरिँदै आएको छ। प्रवासमा जन्मिँदै हुर्किँदै गरेका दोस्रो पुस्तालाई भाषा, संस्कार र तामाङ संस्कृतिसँग जोडिराख्ने उद्देश्यले यस्ता कार्यक्रमहरू नियमित रूपमा आयोजना गरिँदै आएको तामाङ समाज टेक्ससले जनाएको छ।

ड्यालसको इर्भिङमा आयोजना हुने उक्त कार्यक्रममा सहभागी भई तामाङ भेषभूषा, संस्कृति र परम्पराको अवलोकन गर्न तामाङ समाज टेक्ससले सम्पूर्ण नेपाली समुदायलाई हार्दिक आग्रह गरेको छ।