काठमाडौँ । नेपाली काग्रेसबाट निर्वाचित बनेपा नगरपालिकाका वडाध्यक्ष बादेलाई १५ लाख घुससहित रंगेहात पक्राउ गरेका छन् । अख्तियार दुरुपयोग अनुसन्धान आयोगको टोलीले १५ लाख घुससहित काभ्रे बनेपा नगरपालिका वडा नं. ९ का ४२ वर्षीय वडाध्यक्ष नृपेश बादेलाई पक्राउ गरेको हो ।

अख्तियार दुरपयोग अनुसंन्धान आयोगबाट खटिएको टोलीले वडाध्यक्ष बादेसँगै आएको बा ७ च १२९ न. को कारचालक सिन्धुपाल्चोक बाह्रबिसे नगरपालिका वडा नं. ७ मिलनटार स्थायी घरभई हाल चाँगुनारायण नगरपालिका–२ दुवाकोट बस्ने ३१ वर्षीय पदमबहादुर प्रधानसमेतलाई गाडीसहित नियन्त्रणमा लिएको आयोगको जारी विज्ञप्तीमा उल्लेख गरिएको छ ।

आयोगद्धारा जारी विज्ञप्ती अनुसार घरबाटो सिफारिस गर्ने प्रयोजनको लागि १५ लाख घुस लिइसकेको अवस्थामा वडाध्यक्ष बादेलाई बुधबार राति भक्तपुर मध्यपुर ठिमी नगरपालिका ३ गठ्ठाघरबाट नियन्त्रणमा लिएको हो ।