धुलिखेल ६ बैशाख : सरकारले वैशाख मसान्तसम्म शहरी क्षेत्रका विद्यालय बन्द गर्ने निर्णय गरेको छ । कोरोना संक्रमण बढेपछि

सोमबार बालुवाटारमा बसेको मन्त्रिपरिषद् बैठकले कोरोना संक्रमण बालबालिकामा फैलिन सक्ने भन्दै शहरी क्षेत्रका विद्यालय वैशाख मसान्तसम्म बन्द गर्ने निर्णय गरेको हो बैठकले विद्यालयमा जनस्वास्थ्यका मापदण्ड लागू गराउन सम्भव नहुने भएकाले पठनपाठनलाई अनलाइन माध्यममा लैजाने निर्णय गरेको शिक्षामन्त्री कृष्णगोपाल श्रेष्ठले जानकारी दिए ।

सरकारको निर्णयसँगै शहरी क्षेत्रहरू काँकडभिट्टा, बिर्तामोड, दमक, विराटनगर, इटहरी, धरान, जनकपुर, राजविराज, वीरगञ्ज, काठमाडौं, ललितपुर, बनेपा,धुलिखेल, भक्तपुर, हेटौँडा, पोखरा, बुटवल, भैरहवा, घोराही, तुलसीपुर, नेपालगञ्ज, धनगढी र भीमदत्तनगरका विद्यालय पूर्णरुपमा बन्द हुनेछन् ।

यस्तै, शहरी क्षेत्रबाहेक जिल्ला सदरमुकामका विद्यालयमा पनि शैक्षिक गतिविधि वैशाख मसान्तसम्म भर्चुअल रूपमा सञ्चालन गर्नुपर्नेछ ।

बैठकले विद्यार्थीको भविष्य अन्योलमा पर्न नदिन वैकल्पिक माध्यमबाट पठनपाठन र परीक्षा नरोकिने मन्त्री श्रेष्ठले बताए । उनका शहरी क्षेत्रबाहेक ठाउँका विद्यालय भने जिल्लास्थित डीसीसीएमसीको सिफारिसमा बन्द गरिनेछ । कोरोनाको दोस्रो लहर सुरु भएसँगै बालबालिकाकामा संक्रमण बढ्दै गएपछि विद्यालय बन्द गर्ने निर्णयमा सरकार पुगेको हो ।

यसअघि स्वास्थ्य तथा जनसंख्या मन्त्रालयले काठमाडौं, ललितपुर,कास्की, रूपन्देही, चितवन, बाँके, पर्सा, भक्तपुर, कैलाली, मोरङ, दाङ, सुर्खेत, बारा र बागलुङलाई कोरोना संक्रमणको अति प्रभावित जिल्लाको सूचीमा राखेको थियो ।