धुलिखेल, १ मंसिरः काभ्रेमा एकैदिन ३ जना कोरोना संक्रमितको निधन भएको छ । स्वास्थ्य कार्यालय काभ्रेले उपलब्ध गराएको तथ्याङ्क अनुसार आज एकैदिन ३ जना संक्रमितको निधन भएको हो ।

मृतक ३ जना मध्ये २ जनाको धुलिखेल अस्पता र १ जनाको शीर मेमोरियल अस्पताल बनेपामा निधन भएको हो । मृतक मध्ये पाँचखालका ९१ बर्षीय पुरुष र बनेपाका ७२ बर्षीय पुरुष काभ्रे जिल्लाका हुन् । ७३ बर्षीय पुरुष भने भक्तपुर जिल्लाको रहेको स्वास्थ्य काभ्रेका प्रमुख डाक्टर नरेन्द्र कुमार झाले जानकारी दिनुभयो ।

यसैबीच धुलिखेलका ७६ बर्षीय महिलाको कात्तिक २९ गते निधन भएको स्वास्थ्य कार्यालयले जनाएको छ । महिलाको धुलिखेल अस्पतालमा निधन भएको हो । यो सँगै कोरोना भाइरसबाट संक्रमित भएका काभ्रेका ३१ जनाको निधन भइसकेको छ ।

जिल्लामा आज ११ जना नयाँ संक्रमित थपिएका छन् । आज थपिएका संक्रमितमा सबैभन्दा बढी बनेपा नगरपालिका ५ जना महिला र १ जना पुरुष छन् । तयस्तै धुलिखेल नगरपालिकाका १ जना पुरुष, पनौती नगरपालिकाका १, १ महिला र पुरुष र नमोबुद्ध नगरपालिकाका २ जना पुरुष रहेको स्वास्थ्य कार्यालयले जनाएको छ । यो सँगै जिल्लामा कोरोना संक्रमितको संख्या २२४३ पुगेको छ ।

आज २० जना संक्रमितले कोरोना भाइरस जितेका छन् । यो सँगै कोरोना भाइरस जित्नेको संख्या १७०३ पुगेको छ । जिल्लामा होम आइसोलेसनमा ४७२ जना रहेका छन् भने अस्पतालको आइसोलेसनमा ३७ जना रहेका छन् ।