धुलिखेल, १३ असारः काभ्रेको बनेपा नगरपालिका वडा नम्बर ३ ठूलीचौरमा शहरी स्वास्थ्य केन्द्र सञ्चालनमा आउने भएको छ । शहरी स्वास्थ्य केन्द्रका लागि अहिले भवन धमाधम निर्माण भइरहेको वडाध्यक्ष कृष्ण प्रसाद दाहालले जानकारी दिए ।

शहरी केन्द्रको आज प्रदेश सांसद बसुन्धरा हुमागाई र उपप्रमुख रेखा सापकोटा दाहालले शिलान्यास गरेका हुन् । स्वास्थ्य केन्द्र निर्माणका लागि नगरपालिकाले २० लाख आर्थिक सहयोग गरेको छ । स्टोर सहितको चार कोठाको भवन बन्नेछ । अहेब, अनमी र एक जना कार्यालय सहयोगीको दबरन्दी हुनेछ ।

त्यस्तै वडाको नयाँ प्रशासनिक भवन समेत निर्माण भइरहेको छ । ७० लाख लागतमा वडा कार्यालयको भवन निर्माण भइरहेको वडाध्यक्ष दाहालले बताए । यो रकम जिल्ला समन्वय समितिले उपलब्ध गराएको हो । बैठक कोठा सहित दुई तल्ले भवनमा ७ कोठा तयार गरिनेछ ।