काठमाडौं, १० चैत । फ्रान्सबाट आएकी नेपाली युवतीमा कोरोना भाइरस पोजेटिभ देखिएपछि सरकारले उनको सम्पर्कमा आएकाहरुको खोजी गर्न थालेको छ ।

स्वास्थ्यमन्त्री भानुभक्त ढकालले काठमाडौं निवासी ती १९ वर्षीया युवतीको सम्पर्कमा आएजति सबैको खोजी थालिएको जनाएका छन् । सोमबार मन्त्रालयमै गरिएको पत्रकार सम्मेलनमा मन्त्री ढकालले भने, ‘उनको परिवारलाई सरकारको निगरानीमा होम क्वारेन्टाइनमै राखिसकिएको छ ।’ फ्रान्सबाट कतार हुँदै काठमाडौं आउने क्रममा उनी सवार जहाजका यात्रुको पनि खोजी भइरहेको मन्त्री ढकालले जानकारी दिएका छन् ।

‘उक्त जहाजमा सवार अन्य यात्रुको अवस्थाबारे पनि खोजी गरिरहेका छौँ’, उनले भने, ‘अहिलेलाई उक्त जहाजबारे नखुलाऊँ, युवतीको सम्पर्कमा आएका सबैलाई क्वारेन्टाइनमा लान्छौँ ।’ स्वास्थ्य मन्त्री ढकालकाअनुसार फ्रान्समा अध्ययन गर्दै गरेकी ती युवती काठमाडौंकै बासिन्दा भएकाले उनी बसेको क्षेत्रका मानिससँग सरकारद्वारा सोधखोज थालिएको छ ।