धुलिखेल, १४ माघः झण्डै एक महिनादेखि बन्द रहेको धुलिखेल स्थित काठमाण्डौ विश्वविद्यालयको पठनपाठन सुचारु भएको छ । केयुमा मंगलबारदेखि पठनपाठन सुचारु भएको हो । विभिन्न माग राख्दै केयु प्राध्यापक संघ र कर्मचारी संघले पठनपाठन ठप्प पारेर आन्दोलनमा उत्रिएका थिए ।

तर हिजो बसेको केयुको विशेष सभामा प्रधानमन्त्री एवं कुलपति केपी शर्मा ओलीले पठनपाठन अवरुद्ध नगर्न र मागका बारे छलफल गर्ने बताएपछि पठनपाठन सुचारु भएको प्राध्यापक संघका अध्यक्ष वेदमणि दाहालले जानकारी दिए । अर्को सभा पुनः माघ २१ गते बस्दैछ । उक्त सभामा आफुहरुको माग सम्बोधन हुने दाहालले बताए । ‘कुलपति भनेको विश्वविद्यालयको अभिभावक हो, सभामा उहाँले पठनपाठन अवरुद्ध नगर्न र मागको बारे छलफल गर्ने बताउनुभएको छ, दाहालले भने ‘कुलपतिले माग उपर छलफल गर्ने आश्वासन दिनुभएको छ, अविश्वास त हामी पनि गर्न त मिलेन नि ।’

यसअघि पनि काठमाडौं विश्वविद्यालय प्राध्यापक संघ र काठमाडौं विश्वविद्यालय कर्मचारी संघले गत साउन २३ गते देखि पेशागत अधिकार सम्वन्धि चार बुँदे माग राखी सुरु गरेको आन्दोलन ४० दिन लामो आन्दोलन गरेका थिए ।