धुलिखेल, ११ पुसः कुनै एक जवना थियो बनेपाको शीर मेमोरियल अस्पतालका कर्मचारीहरु आफुलाई परेको समस्या धक खोलेर ब्यवस्थापकसँग भन्न सक्दैन्थे ।

तर अहिले परिस्थिति अलिक फेरिएको छ कर्मचारीको । तर ब्यवस्थापकको नजरमा खास परिवर्तन आउन सकेको देखिदैँन । देशकै पुरानो अस्पतालभित्र पर्छ शीर मेमोरियल पनि । यहाँ धेरैले आजिवन काम गरिसकेका छन् ।

शुक्रबार संयोक एक, सम्झना अनेक । कार्यक्रम थियो शीरमा गठन भएको नेपाल स्वास्थ्यकर्मी तथा कर्मचारी युनियनको पहिलो अधिवेशन । कर्मचारीहरु दिल खोलेर आफ्नो कुरा सुनाउने कोशिस गरिरहेका थिए तर ब्यवस्थापक एक जनापनि उपस्थित थिएनन् । सुन्ने ब्यवस्थापक नभएपनि सुनाउने आवाज भने शीरमा निकै ठूलो देखियो । यतिसम्म कर्मचारी संगठित बनेर आवाज बुलन्द पार्न उनीहरुले ठूलै योगदान गरेका छन । त्याग पनि ।

कर्मचारीहरुले विगत सम्भिए । भक्कालिए । आफ्नो हकअधिकारको कुरा गर्दा ब्यवस्थापकबाट झेलेको दुःखले उनीहरु भित्रभित्रै पिरोलिरहेका थिए । त्यसैमा मेसो मिलाए जिल्ला समन्वय समितिका प्रमुख उद्धव केसीले । भने ‘कुनै बेला म यहि अस्पतालमा उपचारको लागि लामो समय बसे । त्यहि बेला मलाई लागेको थियो कर्मचारी युनियन बनाउनुपर्छ । आज मेरो पनि सपना पूरा भएको छ । तपाईहरु यसैगरी लाग्नोस, आफ्नो कर्मब्यलाई नभूल्नोस र अधिकार पनि नछोडनोस ।’

ब्यवस्थापकको ब्यवहारले आजित भएका उनीहरुलाई नेपाल स्वास्थ्यकर्मी तथा कर्मचारी युनियनका केन्द्रिय अध्यक्ष चन्द्र बहादुर थापाले आफ्नो हकअधिकारबाट पछि नहट्न र आफुपनि कर्मचारीकै हकहितमा लडिरहेको बताएर सान्त्वना दिए । उनले स्वास्थ्य क्षेत्रको वेथिती हटाउन कर्मचारी युनियनले महत्वपूर्ण भूमिका खेलेको बताए । कर्मचारीसँगको समन्वयले मात्रै संस्था बलियो हुने भएपनि ब्यवस्थापकले कहिल्यै कुरा नबुझ्ने गरेका कारण कर्मचारी सधै मारमा पर्ने गरेको उनको तर्क थियो ।

ब्यवस्थापकसँग एकसाथ मिलेर निकै पैठेजोरी खेल्दै आएका शीर मेमोरियल अस्पतालका कर्मचारीहरुले संगठनको नयाँ नेतृत्व चयनमा पनि कुनै विवाद गरेनन । अधिवेशनले तदर्थ समितिका संयोजक राजकुमार श्रेष्ठलाई नै अध्यक्षको जिम्मेवारी दिएको छ ।

उपाध्यक्षमा ऋतुपूर्ण श्रेष्ठ, सचिवमा गोकुल प्रसाद धिताल, कोषाध्यक्षमा शिव प्रसाद मानन्धर र सहसचिवमा राधिका बस्नेत चयन भएका छन । अधिवेशनले कार्यसमितिमा अन्य १० जना सदस्य पनि चयन गरेको नवनिर्वचित उपाध्यक्ष ऋतुपूर्ण श्रेष्ठले जानकारी दिए । ‘हाम्रो मुद्दालाई अझ बलियो बनाउन साथीहरुको साथले हौसला दिएको छ, उपाध्यक्ष श्रेष्ठले भने ‘प्रहरीको बुट र लठ्ठी पश्चातको यो अभियानले संस्था र कर्मचारी दुबैको भलो गर्नेछ ।’

सेभेन डे एड्भेन्टिष्ट चर्चले सञ्चालन गरेको यो अस्पतालका ब्यवस्थापकले कर्मचारीको कुनै पनि समस्या नसुनिरहेको कर्मचारीहरु गुनासो छ ।