काभ्रे/काभ्रेपलाञ्चोक जिल्लाका कृषकले घरमै बसी बसी मौसमको जानकारी लिन पाउने भएका छन् । जिल्लाका कृषकलाई मौसम सम्बन्धी जानकारीका लागि रेनगज र थर्मोमिटर प्रदान गरिएको छ । मौसम सम्बन्धी साम्रगी, सिमकार्ड सहितको स्मार्टफोन वितरण गरिएको कार्यालयका सुचना अधिकारी थर्क जिसीले जानकारी दिए । कृषकलाई सुचना प्रविधिले जोड्न सके उत्पादन बढ्ने र ठगिनबाट बच्न भएकाले सामग्री वितरण गरिएको कार्यालयले जनाएको छ ।

सिमकार्ड, मोबाइल फोन, रेनगज र थर्मोमिटर पाउनेमा जिल्लाको अति विकट डाँडापारी क्षेत्रको गोकुले देखि दुर्गम कोशीपारी क्षेत्रको विर्तादेउरालीसम्मका ४३ कृषक समूह र सहकारी रहेका छन् । “कुन समयमा कस्ताखालका खेतीपाती लगाउने भन्ने बारे यो प्रविधिले कृषकलाई जानकारी लिन सजिलो हुन्छ् जिसीले भने “कृषीमा आधारित हाम्रो मुलुकमा यस्तो प्रविधिको ग्रामीण भेगसम्म खाँजो रहेको छ ।”

जलवायु प्रकोप समुन्थान निर्माण आयोजना अन्तर्गत वितरण गरिएको स्मार्टफोनमा कृषक पल सेन्टर नामको एप्प समेत राखिएको छ । जसले कृषकलाई बजार भाउ पत्ता लगाउन सजिलो हुने छ भने मौसमी तथा बेमौसमी खेतीका गर्ने समय, विधि र तरिकाका बारे समेत जानकारी हुने छ । प्रति समूह २५ हजार बराबरको सामान वितरण गरिएको कार्यालयले जनाएको छ । कृषकलाई बाडिएको सिमकार्ड नम्बर जिल्ला कृषि विकास कार्यालयले पनि राखेको छ । यसले कृषकलाई नयाँ प्रविधिका बारे जानकारी गराउन थप सजिलोे हुने कार्यालयले जनाएको छ । काभ्रे जिल्ला तरकारी र अन्न उत्पादनमा आत्मनिर्भर जिल्ला हो ।