धुलिखेल १ बैशाख: वि सं २०७६ साल सुरु भएको आज पहिलो दिन । नयाँ वर्ष मनाउनेहरुले काभ्रेको पर्यटकीय स्थलहरु भरिएका छन् । राजधानी काठमाण्डौँ उपत्यकाका साथै, छिमेकी जिल्लाका विभिन्न सङ्घसंस्था, समूहहरु नयाँ वर्ष मनाउन काभ्रे आइपुगेका छन् ।

राजधानीबाट नजिक काभ्रेको सदरमुकाम धुलिखेलस्थित फिक्निक पार्क, देविस्थान डाँडा, हजार सिँढी लगायतका ठाउँमा पर्यटकहरुको संख्या ह्वात्तै बढेको छ । त्यसैगरी नमोबुद्ध, दोलालघाट, पलाञ्चोक, नगरकोट, भकुण्डे, नौबिसेलगायत सुनसान तथा पर्यटकीय स्थलहरुमा वनभोज र विभिन्न साँस्कृतिक कार्यक्रम गरी नयाँ बर्ष मनाउनेहरुको चहलपहल विहानै देखि देखिएको छ ।

नयाँ वर्षको पूर्वसन्ध्यामा शनिबार बेलुका धुलिखेल र नगरकोट गुञ्जयमान बनेको थियो । धुलिखेलमा रहेका ठूला होटलहरुमा भेला भएका आन्तरिक तथा बाह्य पयर्टकहरुले रमाइलो गरी २०७५ सालको बिदाई र नयाँ वर्ष २०७६ सालको स्वागत गरेका छन् । राति अबेरसम्म पनि धुलिखेल संगीतमय बनेको थियो ।

नयाँ वर्षमा विभिन्न ठाउँबाट मानिसहरुको उपस्थिति धुलिखेलमा धेरै हुने र अप्रिय घटना हुन सक्ने भन्दै प्रहरीले आफ्नो सक्रियता अघिल्लो दिनको तुलनामा निकै बढाएको छ ।