बझाङ । बझाङको केदारस्युँ गाउँपालिका–७ भामचौर नजिकै डाँडाइजर सुडेधार खोलामा जीप दुर्घटना हुँदा दुई जनाको घटनास्थलमै मृत्यु भएको छ भने ६ जना गम्भीर घाइते भएका छन्।

स्थानीयबाट प्राप्त जानकारीअनुसार काँडाचौरका स्थानीय बासिन्दा बोकेर बाग्थलातर्फ आउँदै गरेको से ००१ च ४३७६ नम्बरको जिप ब्रेक फेल भई बिहान ८:४५ बजे अनियन्त्रित भई सडकबाट करिब २० मिटर तल खसेर दुर्घटनामा परेको हो। दुर्घटनामा परी ज्यान गुमाउनेमा केदारस्युँ गाउँपालिका–७ काँडाचौरका गोपाल धामी र पवित्रा धामी रहेका छन्। उनीहरू दुवैको घटनास्थलमै मृत्यु भएको स्थानीय दलबहादुर धामीले जानकारी दिनुभएको छ।

प्रहरीका अनुसार उक्त जीपका चालक बुङ्गल नगरपालिका–२ गिरौँका मोहन धामी हुन् भने जिप केदारस्युँ गाउँपालिका–७ का वडाध्यक्ष चन्द्र धामीको रहेको खुल्न आएको छ। दुर्घटनामा परि ६ जना घाइतेको अवस्था गम्भीर रहेको छ भने अन्य ७ जनाको अवस्था भने सामान्य रहेको बताइएको छ। घाइतेहरूको उद्धार तथा थप उपचारका लागि स्थानीय बासिन्दा र प्रहरी टोली घटनास्थलमा खटिएको छ। घटनाबारे थप विवरण आउन बाँकी छ।