काठमाडौं । काठमाडौं उपत्यकामा ट्राफिक नियम उल्लङ्घन गर्ने १५१ सवारीसाधनमाथि पछिल्लो २४ घण्टामा कारबाही गरिएको छ।

उपत्यका ट्राफिक प्रहरीका अनुसार आइतबार बिहान ६ बजेसम्म मादक पदार्थ सेवन (मापसे) गरी सवारी चलाउने ८४ जना चालक कारबाहीमा परेका छन्।

त्यस्तै, सीसीटीभी निगरानीबाट ५, ट्राफिक बत्तीको संकेत (रेड लाइट) उल्लङ्घन गर्ने ३, लेन अनुशासन पालना नगर्ने १ तथा सवारीसाधनको अवस्था ठीक नभएका २ जनामाथि कारबाही गरिएको छ।

यसैगरी, अन्य ट्राफिक नियम उल्लङ्घन गर्ने ५६ सवारीसाधनमाथि पनि कारबाही गरिएको प्रहरीले जनाएको छ।

ट्राफिक नियम उल्लङ्घनका घटनामा मापसे गरी सवारी चलाउने चालकको संख्या सबैभन्दा बढी देखिएको छ। प्रहरीले सवारी दुर्घटना न्यूनीकरण र सडक अनुशासन कायम गर्न नियमित निगरानी तथा कारबाहीलाई निरन्तरता दिएको जनाएको छ।