सुर्खेत । चारैतिर हरिया पहाड र डाँडाकाँडाले घेरिएको सुर्खेतको वीरेन्द्रनगर उपत्यका यतिबेला पाकेको धानको सुनौलो रङमा सजिएको छ। समथर फाँटमा लहलह झुलेका धानका बाला र हावासँगै लहराइरहेका पहेँलपुर खेतले उपत्यकाको सौन्दर्यलाई थप मनमोहक बनाएका छन्।

मानौँ, हरिया पहाडको काखमा प्रकृतिले सुनौलो गलैँचा बिछ्याएर वीरेन्द्रनगरलाई सिँगारेकी छन्। क्षितिजसम्म फैलिएका धानखेतले उपत्यकालाई आकर्षक बनाएका छन् भने पाकेको बालीले किसानको वर्षभरिको मेहनत र परिश्रमको प्रतिफल झल्काएको छ।

वर्षभरि पसिना बगाएर धान रोपेका किसानका खेतमा अहिले बाली पाकेर तयार भएको छ। धान भित्र्याउने समय नजिकिँदै गर्दा किसानमा खुसी र आशा छाएको छ। मौसमले साथ दिएमा केही दिनभित्रै किसानहरू पाकेको धान काट्न र भित्र्याउन व्यस्त हुनेछन्।

वीरेन्द्रनगर उपत्यकाको यो सुनौलो दृश्य प्रकृतिको सुन्दरता मात्र होइन, कृषि र किसानको जीवनसँग जोडिएको समृद्धिको प्रतीक पनि हो। पहाडको हरियाली र खेतको सुनौलोपनले सजिएको उपत्यकाले कृषि, प्रकृति र श्रमबीचको सुन्दर सम्बन्धलाई उजागर गरेको छ।