काठमाडौं । नेकपा (एमाले)को स्थायी कमिटी बैठकमा पूर्वराष्ट्रपति विद्यादेवी भण्डारी सहभागी भएकी छन्। वरिष्ठ नेता मनोनीत भएपछि पार्टीको महत्वपूर्ण बैठकमा उनको यो पहिलो सहभागिता हो।

एमाले सचिवालयले ८ असोजमा भण्डारीलाई वरिष्ठ नेता बनाउने निर्णय गरेको थियो। उक्त निर्णयलाई त्यसपछि बसेको केन्द्रीय कमिटी बैठकले अनुमोदन गरेपछि भण्डारीले पार्टीको शीर्ष तहमा औपचारिक भूमिका पाएकी हुन्। राष्ट्रपति बन्नुअघि एमालेको उपाध्यक्ष रहेकी भण्डारी लामो समय सक्रिय पार्टी राजनीतिबाट बाहिर थिइन्। अहिले वरिष्ठ नेताको जिम्मेवारीसहित पार्टी बैठकमा उनको पुनः प्रवेश भएको हो।

स्थायी कमिटी बैठकमा उनको सहभागिताले एमालेभित्र भण्डारीको नयाँ राजनीतिक भूमिकालाई औपचारिक रूपमा अघि बढाएको संकेत गरेको छ। अब उनी पार्टीका महत्वपूर्ण निर्णय प्रक्रियामा वरिष्ठ नेताको हैसियतमा सहभागी हुनेछिन्।