भक्तपुर, १९ असोज  : वागमती प्रदेशको मुख्यमन्त्री किरण थापा मगरले आज सूर्यविनायक नगरपालिका वडा नं. ८ सिपाडोलस्थित गणेश माध्यमिक विद्यालयका नवनिर्मित भवनको उद्घाटन गर्नु भएको छ । 

सूर्यविनायक नगरपालिकाले उपलब्ध गराएको १० रोपनी सार्वजनिक जग्गामा नेपाल सरकार र एशियाली विकास बैंकको रु. ६ करोड २६ लाख रुपैयाको लागतमा निर्माण भएको सुविधा सम्पन्न २१ कोठे भवनको आज मुख्यमन्त्री थापामगर र सूर्यविनायक नगरपालिकाका प्रमुख वासुदेव थापाले संयुक्त रुपमा उद्घाटन गर्नु भएको हो ।

कार्यक्रममा मुख्यमन्त्री थापाले आफू वडा अध्यक्ष हुँदा नै शिलन्यास गरेको यस विद्यालयको नवनिर्मित भवन भव्य रुपमा निर्माण सम्पन्न भएको देखेर खुसी लागेको बताउदै यसअघि सिपाडोलकै शान्ति निकेतन माध्यमिक विद्यालयको भवन पनि यस्तै गरि भव्य रुपमा निर्माण गर्न सफल भएको बताउनुभयो ।

उहाँले नजिकै रहेको भुवनेश्वरी माध्यमिक विद्यालयको पुरानो भवन पनि नयाँ बनाउन सके सूर्यविनायक नगरपालिका भित्रका अधिकांश सामुदायिक विद्यालयहरु सुविधा सम्पन्न हुने र सूर्यविनायक नगरवासीका बालबालिकाहरु सुविधा सम्पन्न भवनमा पढ्न पाउने बताउनुभयो ।

उहाँले वागमती पाटी भन्ने ठाउँमा थोरै जग्गामा स्थानीयको सहयोगमा जग्गा खरिद गरेर निर्माण गरेको भवनमा यसअघि पढाई हुदै आएकोमा अब सुविधा सम्पन्न भवनमा गुणस्तरीय शिक्षा पाउने विश्वास व्यक्त गर्नुभयो ।

कार्यक्रममा सूर्यविनायक नगरपालिकाका प्रमुख वासुदेव थापाले १० वर्षे आफ्नो दुई कार्यकालमा सूर्यविनायकको विकासमा ठूलो फड्को मारेको बताउदै शिक्षा, स्वास्थ्य र पूर्वाधार विकासमा नगरपालिकाले ठूलो प्रगति गरेको बताउनुभयो । उहाँले नगरपालिकाले सबै जनप्रतिनिधि र कर्मचारीको एकमतका साथ सूर्यविनायकको सवकासका लागि काम गरेको र अब बाँकी सात महिनामा पनि बाँकी रहेका केही कामलाई पुरा गर्न दिनरात खटिने बताउनुभयो । 

उहाँले नगरवासीले तिरेको करलाई नगरपालिकाको विकासका लागि खर्च गरेको बताउदै उहाँले सामुदायिक विद्यालयको भवनदेखि शैक्षिक गुणस्तरलाई बृद्धि गर्न, खलकुदको विकास गर्न, सीपको विकास गर्न र सूर्यविनायक नगर अस्पतालमा गुणस्तरीय स्वास्थ्य सेवा प्रवाह गर्दै नगरवासीको सेवामा निरन्तर लागिरहेको नगर प्रमुख थापाले बताउनुभयो ।

नगरपालिकाका प्रवक्ता एवं वडा नं. ७ का वडाध्यक्ष रविन्द्र सापकोटाले नगरपालिकाले यहाँका सामुदायिक विद्यालयको भौतिक र शैक्षिक गुणस्तरको बृद्धिमा निरन्तर लागिरहेको बताउदै सूर्यविनायकका कतिपय सामुदायिक विद्यालयमा विद्यार्थी भर्ना गर्ने सिट संख्याको अभाव हुने गरेको बताउनुभयो ।

उहाँले सूर्यविनायक नगरपालिकाले सुरु गरेको जनप्रतिनिधिलाई विद्यालय व्यबस्थापन समितिको अध्यक्ष बनाने कार्य र प्रतिस्पर्धाबाट विद्यालयको प्रिन्सिपल छान्ने कार्य पछि शैक्षिक गुणस्तरमा उल्लेख्य सुधार आएको बताउदै वतमान सरकारले अध्यक्ष नियुक्तीको व्यबस्थालाई हटाउन लागे पनि स्थानीय सरकारलाई शैक्षिक अधिकार दिन रोक्न नहुने बताउनुभयो ।

कलाकार मनोज गजुरेलले ९० प्रतिशत भन्दा बढी उच्च शिक्षा पढ्दै गरेको किशाृरकिशोरी विदेशिने गरेको बताउदै विदेशीने विद्यार्थीलाई रोकेर स्वदेशमै अवसर दिन सरकार लाग्नु पर्ने बताउनुभयो ।

कार्यक्रमका सभापति एवं वडा नं. ८ का वडाध्यक्ष पुष्पराज बस्नेतले विद्यालयले नयाँ भवन पाएको बताउदै उद्घाटन कार्यक्रममा सहभागि हुन आउने सबैलाई धन्यवाद व्यक्त गर्नुभयो । उहाँले कार्यक्रममा उत्कृष्ठ विद्यार्थीहरुलाई पुरस्कार, जगत छात्रबृत्ति कोषबाट गरिब तथा जेहेन्दार विद्यार्थीलाई छात्रवृत्ति, एसईईमा उत्कृष्ठ अंक ल्याउने विद्यार्थीलाई पुरस्कार र शिक्षक शिक्षिकालाई सम्मान गरिएको थियो । कार्यक्रममा विद्यार्थीहरुले बिभिन्न सास्ँकृतिक प्रस्तुतीहरु राखेका थिए ।