‘राणाशाही, पञ्चायत र राजतन्त्र ढालेकै शक्तिले फेरि लोकतन्त्र जोगाउनुपर्ने बेला आयो’
काठमाडौं । नेकपा एमालेका महासचिव शंकर पोखरेलले लोकतन्त्र, राष्ट्रियता र सार्वभौमसत्तामाथि संकट देखिए नेपाली कांग्रेससँग सहकार्य गरेर अघि बढ्न एमाले तयार रहेको स्पष्ट संकेत दिएका छन्।
नेपाली कांग्रेसको १५औँ महाधिवेशन उद्घाटन समारोहमा आइतबार सम्बोधन गर्दै पोखरेलले मुलुक फेरि राजनीतिक चुनौतीको संवेदनशील मोडमा पुगेको दाबी गरे। लोकतान्त्रिक व्यवस्था कमजोर पार्ने प्रयास भए त्यसविरुद्ध प्रमुख राजनीतिक शक्तिहरू एक ठाउँमा उभिनुपर्ने उनको चेतावनी थियो।
पोखरेलले कांग्रेस र वामपन्थी शक्तिले नेपालको राजनीतिक परिवर्तनमा विगतमा निर्णायक भूमिका खेलेको स्मरण गराउँदै अहिले पनि लोकतन्त्र जोगाउने जिम्मेवारी राजनीतिक दलहरूमाथि आएको बताए।
‘हामीले हिजो राणाशाही परास्त गर्यौँ, पञ्चायत परास्त गर्यौँ, राजा ज्ञानेन्द्रको तानाशाही परास्त गर्यौँ,’ उनले भने, ‘लोकतन्त्रको रक्षाका लागि फेरि एकपटक सामूहिक रूपमा उठ्नुपर्ने अवस्था आएको छ।’ ‘संसद् र जनप्रतिनिधिसँग संवाद गर्न नसक्ने सरकारबाट लोकतन्त्र बलियो हुँदैन’ पोखरेलले सरकारमाथि अप्रत्यक्ष रूपमा तीखो प्रहार गर्दै निर्वाचित जनप्रतिनिधि, संसद् र नागरिकसँग पर्याप्त संवाद गर्न नसक्ने प्रवृत्तिले लोकतन्त्रप्रति नै प्रश्न उठाउने अवस्था सिर्जना गरेको बताए।
उनले लोकतन्त्र केवल निर्वाचनबाट सरकार बनाउने व्यवस्था नभएको भन्दै नागरिकको आवाज सुन्ने, संसद्लाई प्रभावकारी बनाउने र जनप्रतिनिधिसँग संवाद गर्ने राजनीतिक संस्कार आवश्यक रहेको बताए। ‘नेपाललाई भूराजनीतिक खेलको मैदान बन्न दिइँदैन’ एमाले महासचिवले नेपालमाथि बढ्दो भूराजनीतिक दबाबप्रति पनि दलहरू गम्भीर बन्नुपर्ने बताए। नेपाल अन्तर्राष्ट्रिय शक्तिको प्रतिस्पर्धाको मैदान बन्नसक्ने जोखिम रहेको भन्दै उनले राष्ट्रियता र सार्वभौमसत्ताको सवालमा दलहरूबीच साझा अडान आवश्यक रहेको बताए।
उनका अनुसार छिमेकी मुलुकहरूलाई समेत आश्वस्त पार्ने गरी नेपालले आफ्नो राष्ट्रिय हित स्पष्ट रूपमा परिभाषित गर्नुपर्छ।बाढी, बेरोजगारी र निराशामाथि राज्य असफल भएको संकेत भोटेकोशी र त्रिशूलीमा आएको बाढीले ठूलो क्षति पुर्याएको तथा अझै मानिसहरू बेपत्ता रहेको उल्लेख गर्दै पोखरेलले जलवायु परिवर्तनबाट उत्पन्न संकट अब सामान्य विषय नरहेको बताए।
उनले देशभित्र रोजगारी सिर्जना गर्न नसक्दा युवाहरू ठूलो संख्यामा विदेशिन बाध्य भएको भन्दै सरकार र राजनीतिक दलहरूले नयाँ पुस्ताको असन्तुष्टिलाई गम्भीर रूपमा लिनुपर्ने बताए। ‘इतिहासको गौरवलाई भविष्यको योजना र सङ्कल्पमा बदल्न नसक्दासम्म युवाहरूका सपना पूरा गर्न सकिँदैन,’ पोखरेलले भने। ‘अनुहार फेरेर मात्र हुँदैन, राजनीति नै बदल्नुपर्छ’ सूचना प्रविधिको तीव्र विकाससँगै नयाँ पुस्ताको सोच र राजनीतिक चेतनासमेत बदलिएको भन्दै पोखरेलले राजनीतिक दलहरूले पुरानै शैलीबाट राजनीति गर्न नसक्ने बताए।
उनले कांग्रेसको १५औँ महाधिवेशनले नयाँ पुस्ताको अपेक्षा सम्बोधन गर्नुपर्ने बताए। नेतृत्वमा अनुहार परिवर्तन मात्रै गरेर नपुग्ने भन्दै उनले दलहरूको विचार, संगठन, कार्यशैली र राजनीतिक संस्कारसमेत बदलिनुपर्ने धारणा राखे। पोखरेलको अभिव्यक्तिले कांग्रेसको महाधिवेशन उद्घाटन मञ्चबाटै एमालेले कांग्रेससँग प्रतिस्पर्धासँगै लोकतन्त्र, राष्ट्रियता र सार्वभौमसत्ताका साझा मुद्दामा सहकार्यको ढोका खुला राखेको राजनीतिक सन्देश दिएको छ।
प्रतिक्रिया