काठमाडौं । पूर्वप्रधानन्यायाधीश चोलेन्द्रशमशेर जबरालाई महाराजगञ्जस्थित निवासबाट मध्यराति पक्राउ गरिएको घटनाप्रति नेकपा एमालेका महासचिव शंकर पोखरेलले आपत्ति जनाएका छन्।

पोखरेलले जबराको पक्राउ संविधान, लोकतान्त्रिक व्यवस्था र विधिको शासनको मर्मविपरीत भएको बताएका छन्। सामाजिक सञ्जालमार्फत उनले कानुनी आधार र प्रक्रियामाथि प्रश्न उठाउँदै गलत तथा स्वेच्छाचारी कार्यको समर्थन गर्नु तानाशाही प्रवृत्तिलाई प्रश्रय दिनु भएको टिप्पणी गरेका छन्।

जबरालाई काठमाडौं उपत्यका अपराध अनुसन्धान कार्यालयको टोलीले पक्राउ गरेको हो। तर प्रहरीले उनलाई कुन कसुरमा पक्राउ गरिएको हो भन्ने विस्तृत विवरण अझै सार्वजनिक गरेको छैन। पोखरेलले यस्ता गतिविधिविरुद्ध सबैलाई खबरदारी गर्न आग्रह गरेका छन्।