काठमाडौं । पूर्वप्रधानन्यायाधीश चोलेन्द्र शम्शेर जबरा प्रहरीबाट निवासबाटै पक्राउ परेका छन्। पक्राउको स्पष्ट कारण प्रहरीले औपचारिक रूपमा सार्वजनिक नगरेका बेला उनका भाइ प्रभुशम्शेरले ‘जेनजीबाट थ्रेट रहेको भन्दै दाइलाई पक्राउ गरिएको’ बताएका छन्।

प्रभुशम्शेरका अनुसार आइतबार राति अपराध अनुसन्धान कार्यालय टेकुको टोली महाराजगञ्जस्थित जबराको निवास पुगेको थियो। प्रहरी आएको जानकारी पाएपछि जबराले भाइलाई फोन गरेका थिए। त्यसपछि आफूलाई प्रहरीले ‘जेनजीहरूबाट तपाईंलाई थ्रेट छ’ भन्दै पक्राउ गरेर लगेको जबराले बताएको प्रभुशम्शेरको भनाइ छ।

जबरालाई हाल टेकुस्थित अपराध अनुसन्धान कार्यालयमा राखिएको बताइएको छ। परिवारका सदस्यलाई समेत भेट्न नदिइएको र उनका छोरा भेटका लागि टेकु पुगेको प्रभुशम्शेरले जानकारी दिएका छन्।

जबरालाई पक्राउ गर्नुअघि अदालतबाट पक्राउ पुर्जी लिइएको वा नलिइएको विषयमा समेत प्रश्न उठेको छ। अदालतसम्बद्ध स्रोतलाई उद्धृत गर्दै पक्राउ पुर्जी नलिइएको दाबी गरिएको छ। यस्तो अवस्थामा जरुरी पक्राउ अनुमति लिनुपर्ने कानुनी व्यवस्था रहेको बताइएको छ।

तर जबरालाई कुन कसुर वा कुन उजुरीका आधारमा पक्राउ गरिएको हो भन्ने विषयमा प्रहरीको औपचारिक विवरण सार्वजनिक भएको छैन। पक्राउको कानुनी आधार र कारणबारे प्रहरीको आधिकारिक धारणा आएपछि घटनाबारे थप स्पष्ट हुने देखिन्छ।