काठमाडौं । सर्वोच्च अदालतले राजनीतिक विश्लेषक भरत दाहाललाई रिहा गर्न परमादेश जारी गरेको छ।

दाहालकी छोरी डेनी दाहालले दायर गरेको बन्दी प्रत्यक्षीकरणको रिटमाथि सुनुवाइ गर्दै न्यायाधीशद्वय कुमार रेग्मी र मेघराज पोखरेलको संयुक्त इजलासले उनलाई आजैका मितिबाट तारेखमा राखी रिहा गर्न आदेश दिएको हो।

सर्वोच्चले दाहाललाई थुनामा राखिरहनुपर्ने पर्याप्त आधार र कारण नदेखिएको ठहर गरेको छ। आदेशमा दाहालले संविधान र कानुनविपरीत हिंसात्मक आन्दोलनका लागि आह्वान गरेको नदेखिएको उल्लेख छ।

काठमाडौं जिल्ला अदालतले यसअघि बयान कार्य सम्पन्न गर्न भन्दै पहिलोपटक तीन दिनको म्याद थप गरेको थियो। तर दाहालको बयान असोज ६ गते नै सम्पन्न भइसकेको भन्दै सर्वोच्चले थप थुनामा राख्नुपर्ने आधार नरहेको जनाएको छ।

‘ग्रे-जोन’सम्बन्धी रिपोर्टबारे सामाजिक सञ्जालमा विचार व्यक्त गरेको आरोपमा दाहाललाई साइबर अपराधको कसुरमा असोज ४ गते मोरङको बेलबारीबाट पक्राउ गरिएको थियो।

सर्वोच्चको आदेशसँगै दाहालको हिरासत अन्त्य भएको छ।